Қазақ киносының жауһары "Қыз Жібек" фильмінде "Қыз Жібек" рөлін сомдаған актриса Меруерт Өтекешова Асанәлі Әшімовті ақтық сапарға шығарып салу рәсімінде сөз сөйледі, - деп хабарлайды Аqshamnews.kz тілшісі.
Актриса марқұмды театр үшін "орны толмас қайғы" деп атап, Асанәлі Әшімов жұрт жүрегінде мәңгі қалатынын айтты.
"Бұл - театр үшін орны толмас қайғы. Біздің сүйікті Асанәлі ағамыз алыс сапарға аттанды. Бірақ ол жүрегімізде мәңгі қалады. Халық оны ешқашан ұмытпайды. Асанәлі ағаның ойнаған рөлдері де, түскен фильмдері де, сіңірген еңбегі де ұшан-теңіз", — деді Меруерт Өтекешова.
Оның айтуынша, Асанәлі Әшімов өнер жолының басында жүрген шағында өзіне аға, ұстаз әрі дос ретінде көп демеу болған.
"Маған Асанәлі аға аға ретінде де, актер, ұстаз, дос ретінде де көп көмек көрсетті. Өнер жолын енді бастаған кезімде мен өте жас едім. Төлегенім алыс сапарға кетті, енді Бекежаным - Асанәлі аға да бүгін алыс жолға аттанды. Енді олар жоғарыда бір-бірімен қауышып, бізге жұлдыздай қарап, қамқорлығын көрсететін шығар", — деді актриса.
Сондай-ақ ол келесі жылы театрдың 100 жылдығы тойланатынын еске алып, "бір жыл жетпей қалғанына" өкініш білдірді.
"Әттең, бір жыл жетпей қалды. Келесі жылы театрымыздың 100 жылдығы тойланады. Қалай болғанда да, Асанәлі ағаның орнын ешкім баса алмайды", - деп түйіндеді Меруерт Өтекешова.
Еске салайық, қазақ киносының корифейі, Қазақстанның халық әртісі, Қазақстанның Еңбек Ері Асанәлі Әшімов 21 желтоқсанда 89-ға қараған шағында өмірден озды. Бүгін, 23 желтоқанда оны Алматыда көпшілік ақтық сапарға шығарып салды.