Астанада Tinder арқылы танысып, өзін "Нұрай" деп таныстырған алаяқ жәбірленушіден 4 млн теңгеден астам ақша алып, сот үкімімен 3 жылға бас бостандығын шектеу жазасына тартылды, - деп хабарлайды aqshamnews.kz тілшісі.
Астанада интернет-алаяқтық дерегі бойынша 20 жастағы тұрғынға қатысты сот үкімі шықты. Іс материалдарына сәйкес, айыпталушы танысуға арналған Tinder қосымшасына әйел адамның атымен "Нұрай" деп тіркеліп, парақшасында өзінің Telegram-аккаунтына сілтеме қалдырған.
Telegram желісінде бейтаныс қыздың суретін пайдаланып, жалған аккаунт ашқан күдікті жәбірленушімен хат алмасып, кездесуге уәде берген. Кейін әртүрлі сылтауларды алға тартып, одан жүйелі түрде ақша сұрай бастаған.
Нәтижесінде жәбірленуші үш айға жетпейтін уақыт ішінде қаскөйдің есепшотына 4 млн теңгеден астам қаражат аударған.
Сот айыпталушыны ақпараттық жүйе пайдаланушысына қатысты ірі көлемде жасалған алаяқтық үшін кінәлі деп таныды. Жазаны тағайындау кезінде оның жасаған ісіне шын өкінуі, келтірілген шығынды өз еркімен өтеуі және ауырлататын мән-жайлардың болмауы ескерілген.
Үкім бойынша оған 3 жыл мерзімге бас бостандығын шектеу жазасы тағайындалып, пробациялық бақылау белгіленді.
Мамандар интернетте танысу барысында сақ болуға шақырады: белгісіз адамдардың "жедел көмек", "жолақы", "ауырып қалдым" секілді сылтауларымен ақша сұрауы — алаяқтықтың кең тараған белгісі. Виртуал таныстарға қаржы аудармас бұрын ақпаратты тексеріп, күмәнді жағдайда байланыс үзген жөн.
