Almaty_Joly чат-боты: Алматы жолының жағдайын хабарлаудың ыңғайлы тәсілі
Алматы тұрғындары биыл да өткен жылдағыдай жолдағы шұңқырлар мен басқа да ақаулар туралы арнайы @AlmatyJolybot (https://t.me/AlmatyJolybot) Telegram арнасы арқылы хабарлай алады. Aрна қаланың жол инфрақұрылымына арналған, деп хабарлайды aqshamnews.kz
Өтініш беру үшін қажет:
• Мәтіндік сипаттама;
• Жолдың ақауын көрсететін фото/видео;
• Мекенжай мен нақты координаттар;
• Байланыс мәліметтері.
Түскен өтініш қаралып, әрбір жағдай бойынша тиісті шаралар қабылданады. Өтініш пен ұсыныс тек ресми арналар арқылы қабылданады, ал әлеуметтік желілердегі пікірлер мен жазбалар үнемі қарастырыла бермейді.
2024 жылдың сәуір айынан бастап @AlmatyJolybot чат-ботына тұрғындардан 2 000-нан астам өтініш пен ұсыныс келіп түсті. Барлық өтініш бойынша жауап беріліп, мәселені шешу мерзімі көрсетілді.
Айта кетейік, Алматыда жол инфрақұрылымын жөндеу жұмыстары биыл ақпан айында – белгіленген мерзімнен бұрын басталды. Осы мақсатта энергия үнемдейтін қоспасы бар «жылы асфальт» шығаратын асфальт-бетон зауыты пилоттық режимде іске қосылды.
Сонымен қатар, күн жылынғаннан кейін аудан әкімдіктері көше-жол желісіне ағымдағы (шұңқырлы жөндеу) жөндеу жұмыстарын бастайды. Әр аудан бойынша шамамен 30 000 шаршы метр жол жамылғысы жөнделеді.
Бұған қоса, жазғы кезеңде 300 км жолға орташа жөндеу жүргізу және 35 км жаңа жол салу жоспарланған.