Президент Қасым-Жомарт Тоқаев ұстаздардың Республикалық тамыз конференциясында «Таза Қазақстан» ұғымының мәнін кеңінен түсіндірді, деп хабарлайды aqshamnews.kz
Мемлекет басшысының айтуынша, Таза Қазақстан – қоршаған ортаны таза ұстаумен ғана шектелмейді. «Бұл – ең алдымен ой-сана тазалығы. Жан-дүниесі таза адам қайырымды, мейірімді болады. Қолы таза адам жемқорлыққа бармайды, адал болады. Асыл қасиеттерді бойына сіңірген нағыз адал азаматтар Әділетті Қазақстанның тірегі бола алады», – деді Президент.
Биылдан бастап елімізде «Адал азамат» атты біртұтас тәрбие бағдарламасы іске қосылады. Бағдарлама барлық мектептерде, соның ішінде жекеменшік білім ошақтарында да қолданылады. Сондай-ақ, педагог мамандар даярлайтын жоғары оқу орындарына да енгізу ұсынылды.
Президенттің айтуынша, білім мен тәрбие – кез келген қоғамның қос тұғыры. Мектеп тек білім беріп қана қоймай, өскелең ұрпаққа дұрыс жол көрсететін рухани орталық болуы тиіс. Ұрпақ тәрбиесінде «Отбасы – мектеп – мемлекет» үштігі үйлесімді жұмыс істеуі қажет.
«Жас ұрпаққа еңбексіз еш игілік болмайтынын түсіндіру – басты міндет. Қоғамда масылдыққа жол бермеу керек. Таза Қазақстан – осы идеяны жүзеге асыратын қадамдардың бірі», – деп түйіндеді Қасым-Жомарт Тоқаев.