Қоныс аударған этникалық қазақтар республиканың түрлі өңірлеріне қоныстанған.
Еңбек және халықты әлеуметтік қорғау министрлігінің ақпараты бойынша, 1991 жылдан бері елге 1 млн 151 мыңнан астам этникалық қазақ оралған, - деп хабарлайды aqshamnews.kz
Ведомство мәліметінше, биыл 3 203 этникалық қазақ тарихи отанымен табысып, қандас мәртебесін алған.
"Жыл басынан Қазақстанға келген қандастардың жартысы (48,1 пайыз) Қытайдан, 39,5 пайыз – Өзбекстаннан, 5,8 пайыз – Түрікменстаннан, 2,5 пайыз – Монғолиядан, 1,9 пайыз – Ресейден және 2,2 пайыз басқа елдерден", - делінген хабарламада.
1 сәуірдегі мәлімет бойынша, еңбекке қабілетті жастағы этникалық қоныс аударушылар саны 60,7 пайыз, еңбекке қабілетті жастан кіші 31,1 пайыз және зейнеткерлер 8,2 пайыз болған.
Еңбекке қабілетті жастағы қандастардың ішінен білім деңгейі бойынша 17,9 пайызы жоғары білімді, 27,8 пайызы орта кәсіби білімді, 52,9 пайызы жалпы орта білімді, және 1,4 пайызының білім жоқ.
Қоныс аударған этникалық қазақтар республиканың түрлі өңірлеріне қоныстанған.
"Сонымен қатар, қандастарды қоныстандыру үшін Ақмола, Абай, Қостанай, Павлодар, Атырау, Батыс, Шығыс және Солтүстік Қазақстан облыстары анықталды", делінген министрліктің ақпаратында.
Қоныстандыру өңірлерінде 2025 жылға арналған қандастарды қабылдау квотасы 2 309 адам болады. 2025 жылғы 1 сәуірдегі жағдай бойынша қоныстандыру өңірлеріне 642 қандас қоныс аударды.
Жоғарыда аталған өңірлерде қоныстанған қандастарға көшуге субсидия түрінде мемлекеттік қолдау шаралары ұсынылады – бір мезгілде отағасына және отбасының әрбір мүшесіне 70 АЕК (275,2 мың теңге) мөлшерінде; тұрғын үй жалдауға және коммуналдық қызметтерге ақы төлеуге – бір жыл ішінде 15-тен 30 АЕК (59-ден 118 мың теңгеге дейін) мөлшерінде.