Тәуелсіздік – ата-бабамыздың асыл арманы, ұлттың ұлы мұраты. Осы қасиетті күнді ұлықтау мақсатында №110 мектеп-гимназиясында «Тәуелсіздік жалыны – жүрегімізде»атты рухани-патриоттық бағыттағы мерекелік іс-шара өтті. Бұл тек мерекелік кеш қана емес, бұл – ұлт намысы үшін басын бәйгеге тіккен ерлерге тағзым, азаттықты арман еткен жастарға іштей ескерткіш орнату болды. Іс-шара барысында оқушылар ең алдымен 1986 жылғы Желтоқсан оқиғасының куәгерлерімен жүздесті.«Айбын» орденінің иегері, Қазақстан Республикасының Білім саласының Құрметті қызметкері,ардагер, Патриоттық қозғалыс «Желтоқсан Ақиқаты» Республикалық қоғамдық бірлестігінің Жетісу аудандық филиалының жетекшісі Смагулов Тукен Жумабекұлы мен Ұйым мүшесі,ардагер Қасқабасов Қасым Алсеитұлы сол бір зұлмат күндердің шындығына терең бойлап, ар мен намыс үшін алаңға шыққан боздақтардың көз жасын, жан айқайын жүрекке жеткізе әңгімелеп берді.Сондай-ақ мектебіміздің аға оқытушылары, «Желтоқсан оқиғасының» қатысушылары Салимова Күләш Сабеновна мен Сарсенбина Ляйля Сагмановнаның әңгімесінен алаңдағы мұзға тоңып, намыстан жанған жастардың күресі – бүгінгі ұрпақ үшін ұлы сабақ екенін түсінді. Кездесу кезінде олар тарихи сәттерге шолу жасап, ел тәуелсіздігі жолындағы күрес пен сол күндердің ауыр да, абыройлы жүгін баяндады. Оқушылар желтоқсаншылардың батырлығы мен қайсарлығына тәнті болып, көкейдегі сұрақтарын қойып, ашық-жарқын сұхбат құрды.
Мереке барысында оқушылар желтоқсан көтерілісін көрініс арқылы сахналап, сол бір сындарлы сәттерді шынайы бейнелеп көрсетті. Сол кезеңдегі жастардың ерік-жігерін, әділетсіздікке қарсы тұрған табандылығын, ұлтқа деген махаббатын тебіреніспен жеткізді Бұл көрініс оқушылардың жүрегіне жол тартып, патриоттық сезімін оятты. Сонымен қатар, шара аясында «Арғымақ» тобы патриоттық әндерін орындап, көрермендерді баурап алды. Жас өнерпаздар «Менің Қазақстаным», «Желтоқсан желі», «Рух» сынды әндерді шырқады. Іс-шара барысында тәуелсіз еліміздің бүгінгі жетістіктері мен ұрпақ алдындағы жауапкершілігі туралы ойлар айтылып, тәуелсіздік – мәңгілік құндылық екені терең насихатталды.
Мерекелік кеш соңында мектеп директоры Руфинат Бекдайырқызы қонақтар мен ұйымдастырушыларға алғыс білдіріп,құттықтау жолдады.Кеш қонақтары да батасын беріп, ел болашағы – жас ұрпақтың бойындағы рух пен жігер екендігін жеткізді.
Сонымен қатар мектебіміздің жас суретшілері «Сурет көрмесін» ұйымдастырып,тәуелсіздігіміздің нышаны болған ұлттық рәміздерімізді бейнеледі.Спорт залда дене шынықтыру пәні мұғалімдерінің бастамасымен «Ұлттық ойындар» атты ата-аналардың қатысуымен сайыс өтті.Кітапханамызда «Тәуелсіздік-ел тірегі» тақырыбында мәнерлеп оқу жарысы, ал бастауыш сыныптарда патриоттық бағыттағы ашық сабақтар өткізілді. Есте қаларлықтай әдемі сәттер мен салиқалы сұқбаттарды «АлмаТV» телеарнасы қызметкерлері бейнетаспаға түсіріп, көгілдір экран арқылы көпшіліктің назарына ұсынды.
Осындай тағылымы мол, рухты көтеретін кездесулер мен мерекелік шаралар жас ұрпақтың бойына Отанға деген сүйіспеншілікті сіңіруде үлкен рөл атқарады. Себебі, Тәуелсіздік жалыны – әр қазақтың жүрегінде!