Қазақстанның Ташкенттегі елшілігінің жанындағы референдум учаскесі жергілікті уақыт бойынша таңғы сағат 07:00-де өз жұмысын бастады, деп хабарлайды aqshamnews.kz Kazinform агенттігіне сілтеме жасап.
Ташкенттегі № 399 референдум учаскесі шетелдердегі ең ірі учаскелердің бірі болып табылады. Бүгінгі таңда бұл учаскедегі сайлаушылар тізіміне Өзбекстанда тұрақты тұратын және уақытша жүрген 600 қазақстандық азамат енгізілген.
№ 399 учаскенің төрағасы Жаслан Искаковтың айтуынша, мүмкіндігі шектеулі азаматтардың дауыс беруін қамтамасыз ету үшін арнайы топтар жасақталып, үйде дауыс беру жәшіктерін жеткізу жұмыстары ұйымдастырылған.
Аталған учаскеде Өзбекстанда оқитын қазақстандық студенттер, уақытша жұмыс істеп жүрген немесе тұрып жатқан отандастарымыз, туристер мен іссапарда жүрген азаматтар дауыс береді деп күтілуде.
Ташкент қаласындағы № 399 референдум учаскесі Қазақстан Республикасының елшілігі ғимаратында (Абай көшесі, 1) орналасқан. Дауыс беру жергілікті уақыт бойынша 20:00-ге дейін жалғасады.