Higgsfield AI нарықтағы құны $1 миллиардтан асқан алғашқы қазақстандық стартап атанды, - деп хабарлайды aqshamnews.kz тілшісі.
Todayinfo мәліметінше, жобаның тең құрылтайшысы әрі бұрынғы Snap Inc компаниясындағы генератив жасанды интеллект бөлімінің басшысы Алекс Машрабов Назарбаев университетінде өткен шарада ресми мәлімдеме жасады.
Higgsfield AI - Қазақстаннан шыққан жаһандық жетістік
Higgsfield AI стартапы кейінгі екі жыл ішінде жоғары өсім көрсетіп, әлемдегі ең жылдам дамып келе жатқан технологиялық жобалардың біріне айналды. Жобаның негізін қалаушылар - ЖИ-зерттеуші Ерзат Дулат пен Алекс Машрабов. Стартап әлемнің түкпір-түкпірінен - АҚШ, Қытай, Жапония сияқты алпауыт нарықтардан - миллиондаған белсенді қолданушыларды жинап, жаһандық аудиторияны өзіне қаратты.
Компанияның басты бағыты - генератив жасанды интеллект технологияларын қолдану арқылы жаңа өнімдер мен шешімдер жасау. Бұл стартаптың ерекше әрі тартымды болуының басты себебі - визуал контентті автомат түрде жасайтын, пайдаланушының креативін арттыратын құралдар жүйесі.
$50 млн табыс және венчурлік қолдау
Алекс Машрабовтың айтуынша, Higgsfield AI компаниясы жылдық түсім бойынша $50 миллион межесінен асып, ресми түрде «жалғызмүйіз» мәртебесін иеленді. Бұл жетістікке 15 жыл бойы ешбір қазақстандық компания жете алмаған болатын.
Компанияға Anthropic, OpenAI сияқты жобаларға қаржы салған Menlo Ventures сынды беделді венчурлік қорлар инвестиция құйған. Сонымен қатар, әйгілі бизнес-ангелдер де Higgsfield AI-дың әлеуетіне сенім артып, $16 миллион көлемінде бастапқы инвестиция жасаған.