Таразда мас күйде жолаушылар тасымалдаған №17 бағыттағы автобустың жүргізушісі ұсталды, - деп хабарлайды Аqshamnews.kz Жамбыл облыстық Полиция департаментіне сілтеме жасап.
Оқиға "Қауіпсіз жол" жедел-алдын алу іс-шарасы барысында анықталды. Полицейлер күдік тудырған автобусты тоқтатып, тексеріс жүргізген.
Медициналық сараптама нәтижесінде 55 жастағы жүргізушінің мас күйінде болғаны расталды. Оның үстінен ҚР ӘҚБтК-нің 608-бабының 1-бөлігі бойынша әкімшілік хаттама толтырылды. Сот шешімімен ол 15 тәулікке әкімшілік қамауға алынып, 7 жыл мерзімге жүргізуші куәлігінен айырылды.
"Мас күйде көлік жүргізу жолдағы қауіпсіздікке нақты қатер төндіреді және заң бойынша қатаң жауапкершілікке әкеледі", – деп атап өтті полицияда.