Бортта болған 43 адамның 26-сы құтқарылған
Танзанияда жолаушылар ұшағы көлге құлады, оның бортында 43 адам болған, деп хабарлайды Almaty-akshamy.kz ҚазАқпаратқа сілтеме жасап.
Жергілікті полиция таратқан мәліметке сәйкес, Танзанияның солтүстік-батысындағы Букоба қаласының әуежайына қонуға бағыт алған ұшақ Виктория көліне құлаған. Апатқа ауа райының қолайсыздығы себеп болған деп хабарланды.
«Синьхуа» агенттігінің мәліметінше, жолаушылар ұшағы Дар-эс-Салам қаласынан ұшып келе жатқан. Бортта болған 43 адамның 26-сы құтқарылған. Іздестіру-құтқару жұмыстары аяқталған жоқ.
Сондай-ақ, Кагера аймағының бас дәрігері Исесанда Каникидің айтуынша, апаттан 3 адам қайтыс болған.
Айта кетсек, Италияның оңтүстігінде туристер мінген тікұшақ апатқа ұшырап, 7 адам көз жұмған еді. Оның екеуі – ұшқыш, біреуі – жедел жәрдем дәрігері және қалған төртеуі – словениялық саяхатшы.