Бұл туралы Ғылым және жоғары білім министрі Саясат Нұрбек айтты.
Жоғары білім алғысы келетін талапкерге пайызсыз несие беретін жоба бірнеше банк және қаржы орталығымен бірге әзірленіп жатыр, деп хабарлайды Almaty-akshamy.kz
Министрдің айтуынша, қазір министрлік талапкерлердің ЖОО-ға түсу мүмкіндігін арттырудың бірнеше жолын қарастырып жатыр.
«Біріншіден, жыл соңында жаңа пайызсыз несие жобасы ресми түрде іске қосылады. Қазір ол жоба бірнеше банкпен және қаржы орталығымен бірлесіп әзірленіп, аяқталуға таяды. Заңнамалық тұрғыдан бәрі пысықталған. Мұнда АҚШ-тағы сияқты, талапкерге жоғары білім алуға пайызсыз несие беріледі. Тағы бір жолы – биыл іске қосылған сараланған гранттар жобасы. Кейде талапкер жақсы балл алғанымен, таңдаған мамандығында конкурс жоғары болып, грант жетпей қалады. Сөйтіп, 100-115 балл алып, түспей қалады. Мұндай жағдайда біз қосымша гранттар беруге дайынбыз», -деді Саясат Нұрбек.