Мемлекет басшысы Қасым-Жомарт Тоқаев 2025 жылды «Жұмысшы мамандықтары жылы» деп жариялады. Бұл – ел экономикасын нығайтудағы стратегиялық қадам. Бастама техникалық және кәсіптік білім берудің маңыздылығын арттырып, жұмысшы мамандықтарының беделін көтеруге бағытталған.
Бүгінгі таңда экономиканың барлық салаларында білікті мамандарға сұраныс жоғары. Құрылыс, өнеркәсіп, көлік, қызмет көрсету және басқа да салаларда кәсіби шеберлігі жоғары мамандар қажет. Сондықтан техникалық және кәсіптік білім беру ұйымдарының алдында үлкен міндеттер тұр.
«Алматы жолаушылар көлігі және технологиялар колледжі» – еліміздің техникалық және кәсіптік білім беру жүйесіндегі беделді оқу орындарының бірі. Колледж 2013 жылы құрылып, бүгінгі таңда еңбек нарығының талаптарына сай жоғары білікті жұмысшы мамандарын даярлаумен айналысып келеді.
Колледждің басты мақсаты – білім алушыларға сапалы білім беріп қана қоймай, олардың кәсіби дағдыларын дамыту, болашақ маман ретінде қалыптасуына жағдай жасау. Сондықтан мұндағы білім беру үрдісі де жаңа заман талаптарына сай жүргізіледі. Білім алушылар теориялық білімді тәжірибемен ұштастырып, өндірістік тәжірибеден өтеді. Колледж нарықта сұранысқа ие жұмысшы мамандықтарын даярлайды. Мәселен, шаштараз өнері – сән индустриясында сұранысқа ие мамандық. Білім алушылар мұнда шаш қию, бояу, сәндеу әдістерін меңгереді. Сондай-ақ, электр жабдықтары мамандарын даярлау бағдары электр құрылғыларын жөндеу, техникалық қызмет көрсету сияқты дағдыларды үйретеді. Токарь ісі – металл өңдеу, әртүрлі бөлшектерді дайындау бойынша білікті мамандарды даярласа, дәнекерлеу ісі – өндірістің барлық саласында қажетті мамандық, білім алушылар металл құрылымдарын дәнекерлеуді үйренеді. Автомобиль көлігіне техникалық қызмет көрсету, жөндеу және пайдалану – көлік жөндеу саласында аса сұранысқа ие мамандарды дайындайды. Мәселен, автомобиль жөндеу бойынша слесарь – көліктердің ақауларын анықтап, жөндеуге бағытталған мамандық. Автомобиль көлігін жөндеу шебері – автокөлік диагностикасы, техникалық қызмет көрсету бойынша білім береді. Колледждің «Тігін өндірісі және киім үлгілеу» бөлімі сән саласына қажет мамандарды дайындайды. Білім алушылар киім үлгісін жасауды, тігуді, сәндік әрлеуді үйренеді.
Түлектеріміз табысты еңбек етіп жүр
Колледжіміз заманауи материалдық-техникалық базаға ие, оқу шеберханалары, зертханалар, тәжірибелік сабақтарға арналған арнайы кабинеттер бар, заманауи құралдармен жабдықталған. Жоғары білікті оқытушылар, тәжірибелі ұстаздар мен өндіріс саласының мамандары дәріс береді.
Білім алушылар кәсіби машықтарын арттыру үшін ірі кәсіпорындар мен шеберханаларда өндірістік тәжірибеден өтеді. Қазіргі таңда түлектеріміз өндіріс орындарында, қызмет көрсету салаларында, жеке кәсіпкерлік бағытында табысты жұмыс істеп жүр. Олар түрлі жарыстар мен олимпиадаларға қатысып, өз білімдерін жетілдіре алады.
Бүгінде жұмысшы мамандықтары – ел дамуының басты тірегі. Экономиканың тұрақтылығы мен халықтың әл-ауқаты жоғары білікті мамандарға тікелей байланысты. Алматы жолаушылар көлігі және технологиялар колледжі осы міндетті абыроймен атқарып, елдің еңбек нарығына қажетті мамандарды даярлап келеді. Біз білім алушыларымыздың сапалы білім алып, заманауи технологияларды меңгеруіне, өз ісінің шебері атануына барлық жағдай жасаймыз. Түлектеріміз – ел экономикасының қозғаушы күші, қоғамның сұранысына ие мамандар.
Жұмысшы мамандығын игеру – табысты болашаққа жол ашу. Өз ісін жетік меңгерген, кәсіби шеберлігі жоғары мамандар ғана еліміздің өндірісін алға жылжытып, жаңа белестерді бағындырады.