Мереке аясында мың жасаған шаһардың шамшырағы «Almaty aqshamy» газетінің 35 жылдық мерейтойы аталып өтті.
Бұқаралық ақпарат құралдары күніне орай «Alatau Аqparat» медиахолдингіне біріккен «Almaty aqshamy» мен «Вечерний Almaty» газеттері мен Аlmaty-akshamy.kz және Vecher.kz сайттарының ұжымы табиғат аясына шығып, демалып қайтты.
Ашық аспан астында ұйымдастырылған мерекелік кешке «Қазақ газеттері» ЖШС Алматы филиалының жетекшісі Думан Анаш, «Түркітілдес журналистер қорының» президенті Нәзия Жоямергенқызы мен «Адырна» қоғамдық ұйымының басшысы Арман Әубәкір қонақ ретінде қатысып, медиахолдинг ұжымын кәсіби мерекелерімен құттықтады. Кеш барысында атаулы датаға орай «Alatau Аqparat» медиахолдингінің Бас директоры Ержан Қалымбайұлы «Almaty aqshamy» газетінің Бас редакторы Төрехан Данияров пен «Вечерний Almaty» газетінің басшысы Евгений Рақымжановқа ҚР Парламенті Сенатының төрағасы Мәулен Әшімбаевтың Алғыс хатын табыстады.
«Өткен айда «Alatau Аqparat» медиахолдингін дамытуға қатысты бір жылдық стратегиямызды бекіттік. Алдағы уақытта басылымды заман талабына сай, бүгінгі оқырман сұранысына лайық етіп, сапалы контенттер даярлау, жазылымды арттыру сынды жоспарларымыз бар. Ол үшін бізге жұдырықша жұмылып жұмыс істеу керек. Барлықтарыңыздың отбасыларыңызға амандық, шығармашылықтарыңызға шадыман шабыт тілеймін», – деген медиахолдинг басшысы Ержан Қалымбайұлы қос басылымның бірқатар қызметкерлерін марапаттап, көпбалалы отбасыларға балаларға арналған жазғы демалыс лагерьлеріне жолдамалар ұсынды.
Медиахолдингтің күнделікті қызметі мен дамуына елеулі үлес қосқаны үшін «Almaty aqshamy» газетінің тілшісі Олжас Жолдыбай, корректор Кенже Нүсіпова, бет қаттаушы Айшат Абуова, көлік жүргізуші Нұрсұлтан Құрманов сынды қызметкерлеріміз Алғыс хаттармен марапатталды. Ал Айдын Сұлтанбековке отбасымен демалып қайтуға жолдама берілді.
Таңмен таласа бас қосқан қос ұжымның журналистері бұл күннің Ұлттық домбыра күні екенін де естен шығарған жоқ. Тауға шықса да қанжығасына домбырасын байлап ала жүретін «ақшамдықтар» үшін де бұл киелі аспаптың орны бөлек.
Иә, «әу демейтін қазақ жоқ», «жігітке жеті өнер де аз» деп білетін өнерлі жандар «Ақшамда» да жетерлік. Мерекеге орай жайылған дастархан басында әріптесіміз Естай Божан ақын Жұбан Молдағалиевтің сөзіне жазылған, композитор Илья Жақановтың әні «Еділ мен Жайықты», Кенен Әзірбаевтың «Тік шырқау» әндерін әуелете шырқағанда, ұйып тыңдадық. Күмбірлете күй шерткен әріптестеріміздің өнері де тәнті етті. Мерекелік кеш барысында гитарамен де ән айтылды, би де биленді. Кешіміздің көңілді өтуі үшін қызықты ойындар ұйымдастырылды. Айналасы жасыл желекпен көмкерілген, сылдырап аққан мөлдір суы бар өзен жағасында естелік суреттерге түсті.
«Alatau Аqparat» медиахолдингі табиғат төсіндегі ұжымдық демалысты өзгеше форматта атап өтті.