Желіде Мәжіліс депутаты Дәлет Мұқаевтың видеосы тарады. Онда ол Үкімет отырысында орындықта "жатқаны" көрінеді. Депутат бұл әрекетін түсіндірді, - деп хабарлайды aqshamnews.kz тілшісі.
"Депутат болсаң осы ғой: отырсаң опақ, тұрсаң сопақ боласың. Мына видео алдымнан шыға берді. Жұрттар жарыса жіберіп жатыр. Пікірлер инфарктке апарады. Өз оқырмандарыма айтайын, Үкімет отырысында әрең отырдым. Себебі белімде біраздан бері протрузия (L-5,S-1) бар еді. Белімнің сақинасы айналып кетті ме, грыжаға айналды ма дәл қазіргі кезде отырсам да, жатсам да белім шыдатпай жатыр", - деді ол.
Депутат Үкімет сағатынан соң бірден ауруханаға барғанын айтты.
"Үкімет сағатынан соң ауруханаға барып, укол салдырдым. МРТ-ға орын жоқ, тек келесі аптаға жазылдым. Уколдың күшімен үйіме қайттым. Мені сүйрелеп апарған көлік жүргізушісіне рақмет", - деді ол.