Су үнемдеу технологияларын енгізуді жеделдету мақсатында елімізде кәсіпорындарды өнеркәсіпте суды қайта пайдалану жүйелеріне көшуге ынталандыру бойынша іс-шаралар қабылданды.
Жаңа Су кодексінің редакциясында кәсіпорындар үшін бес жыл ішінде суды айналымды немесе қайта пайдалану жүйелеріне көшу жоспарын әзірлеу талап етілген. Әр облыс бойынша суды қайта пайдалануды ұлғайту үшін 2030 жылға дейін модельдік жоспарлар бекітілген.
2030 жылдың соңына дейін экономика салаларындағы суды қайта пайдалану үлесін 17%-дан 28%-ға дейін ұлғайту көзделуде.
Сондай-ақ, тұрмыстық су үнемдеу бойынша Әдістемелік нұсқаулық қабылданып, су тұтынудың тиімді әдістері ұсынылған. Бұл нұсқаулықта крандардағы ақауларды уақытылы жөндеу, аэрациялық крандарды пайдалану, екі түймелі су ағызу цистерналарын орнату, автоматты сенсорлық су араластырғыштарды қолдану, кір жуатын машинаны толық жүктеме кезінде ғана іске қосу сияқты іс-шаралар қамтылған.
2024 жылы еліміздің 6 өңірінде ауызсуды тарифтеу тәртібі қайта қаралды. Әлеуметтік нормалар енгізілді: айына 3 м³-ден артық су тұтынған жағдайда, нормадан асып кеткен су көлемі үшін тариф жоғарылайды. Бұл шаралар Ақмола, Ақтөбе, Түркістан, Ұлытау облыстары мен Алматы және Шымкент қалаларында айына орта есеппен 1,65 млн текше метр су үнемдеуге мүмкіндік берді. Әлеуметтік нормалар енгізілгенге дейін ауызсу тұтынудың орташа көлемі 21,1 млн текше метр болған болса, бүгінгі таңда бұл көрсеткіш 19,5 млн текше метрге дейін төмендеді.
Су шаруашылығы инфрақұрылымын жаңғырту, суды үнемдейтін технологияларды енгізу, суды есепке алу жүйесін цифрландыру және халық пен кәсіпорындар арасында су үнемдеу мәдениетін дамыту Қазақстан халқына жоғары сапалы сумен қамтамасыз етуге мүмкіндік береді.