Өскелең ұрпақтың жүрегінде Отанға деген сүйіспеншілік биік болуға тиіс. Алматы қаласындағы «Каспий» колледжінің «Жас бүркіт» әскери-патриоттық қозғалысының 300-ге жуық студентіне Ұлттық ұланның Кеңес Одағының Батыры, гвардия полковнигі Бауыржан Момышұлы атындағы 5571 әскери бөлімінде «Ашық есік күні» өтті, деп хабарлайды аlmaty-akshamy.kz.
Жастар әуелі әскери бөлімнің аумағына кіріп, саптық алаңға сапқа тұрғызылды. Содан кейін радиациялық химиялық биологиялық қорғаныс мүліктерімен жақын танысып, оларды кию тәртібін үйреніп, қорғаныс құралын жылдам кию бойынша кішігірім жарыс та ұйымдастырылды. Жақсы нәтиже көрсеткен студенттерге сыйлықтар табысталды.
Студенттерге қызметтік иттерді пайдалана отырып көрсетілген сабақ қатты ұнады. Кинологиялық қызмет мамандары қызметтік иттермен қылмыскерді ұстау іс-қимылын көрсеткен болатын.
Іс-шара соңында бөлімінің мәдени-демалыс орталығында «Ұлы дала ұландары» деректі фильмі көрсетілді.
«Жас бүркіт» әскери-патриоттық қозғалысының студенті Жанар Қайрат:
«Бізге әскерде өзіңді қалай дұрыс ұстау керектігін, қару-жарақты дұрыс қолдану тәртібін және әскери техникаларды көрсетті, не үшін қажеттігін түсіндірді. Казармамен таныстырды. Әр сарбаздың орындықтарын, олардың нөмірленгенін, жатын төсектерін көрдік. Қызметтік иттердің пәрмендер бойынша жаттығуларды екі етпғй орындауын тамашаладық. Маған әскери оркестрдің орындаған патриоттық әндері ерекше әсер етті. Бойымды мақтаныш сезімі кернеді», – дейді.