Жақында «Алатау» дәстүрлі өнер театрының бір топ актері Түркияның Стамбул қаласындағы білім жетілдіру курсына аттанып, Анадолы елінен ерекше сезіммен, шығармашылық шалқар шабытпен оралды.
Бір өзінде 22 миллионға жуық адам қоныстанған, 3 мыңнан аса мешіті бар, Босфор теңізін жайлаған тарихы көне, жасампаз шаһардың қым-қуыт тірлігі қызып жатыр. Өнер мамандары үлкен аумақты алып жатқан Ататүрік атындағы Мәдени орталықты тамашалап, 2 000 орындық опера театры мен 800 орындық драма театрының акустикалық-техникалық әлеуетін сезініп қайтты.
«Театр актерлері дәстүрлі сахна өнерімен қатар мұнда актерлік шеберлікті насихаттайтын Тeyk sahna театрының ұстаздары – Седа Оғуз, Беркуль Улусой, Утку Четин сынды кино және театр актерлерінен «Қазіргі театрға классикалық пьессаларды бейімдеу» тақырыбында дәріс тыңдап, кейіпкер құрудан шеберлік сабақтарынан өттік», – деді қуанышымен бөліскен театрға қарасты көру және есту мүмкіндігі шектеулі азаматтардың мәдени демалысын ұйымдастыру бөлімінің қызметкері, танымал журналист Гүлжанат Шонабай.
«Алатаудай» жас театрдың аймаңдай актерлері – Дәулет Арипов, Әсет Есжан, Динара Төлепбергенова, Тимур Пиязов, Есенай Ильясов, «Ұлытау» тобының домбырашысы Рүстем Байекеев түрік әріптестермен емен-жарқын пікірлесіп, өзара тәжірибе алмасты. «Ел тәуелсіздігі қарсаңында «Алатау» дәстүрлі өнер театрының қос бірдей дүлдүлі, дарынды актерлер – Әсет Есжан мен Шаттық Уатқан мемлекеттік «Дарын» жастар сыйлығымен, ал бишілер жетекшісі, хореограф Жанна Жұмабекқызы ҚР Театр қайраткерлері одағының «Еңлікгүл» сыйлығымен марапатталды! Сөйтіп, Түркиядан қайтар күні сүйінші жаңалықты естіп, мерейіміз теңіздей тасыды», - деді ұйымдастыру бөлімінің қызметкері.
Осынау марапат жауған қуанышты күні лауреаттар әріптестері алдында марапатталып, Стамбулдағы 3 күндік байыпты бағдарламаны сәтімен аяқтаған азаматтарға құрметпен сертификат тапсырылды. «Ел асырып, жер танытып, таным-білім көкжиегімізді кеңейтуге мүмкіндік берген «Алатау» театрының әкімшілігіне, Алматы қаласының мәдениет басқармасына үлкен ризашылығымызды білдіреміз» дейді мерейі тасыған театр мамандары.