Солтүстік Қазақстан облысында "Чистополье – Шөптікөл" автожолында екі полицей қызметтік міндетін атқару кезінде жол апатынан көз жұмды, деп хабарлайды Aqshamnews.kz облыстық полиция департаментіне сілтеме жасап.
Ведомствоның мәліметінше, Chevrolet Cobalt пен Toyota Camry көліктері соқтығысып, екі жүргізуші оқиға орнында қаза тапқан. Марқұмдардың екеуі де ішкі істер органдарының қызметкерлері болған.
«Апаттың мән-жайы мен себебін анықтау үшін сотқа дейінгі тергеу басталды. Полиция департаменті қаза болғандардың туыстары мен жақындарына қайғыра көңіл айтады», – делінген хабарламада.
Ішкі істер министрі Ержан Сәденов Instagram парақшасында марқұмдардың отбасына көңіл айтып, министрлік тарапынан барлық қажетті көмек көрсетілетінін мәлімдеді.
«Қызметтік міндетін атқару барысында жол апатынан қаза тапқан полиция майоры Владимир Синицын мен полиция аға лейтенанты Дәулетхан Қазыханның туған-туыстарына қайғыра көңіл айтамын. (…) Борышын өтеу жолында өмірін қиған әрбір қызметкердің есімі ішкі істер органдарының жадында сақталады», – деп жазды министр.