2025 жыл Қазақстанда Жұмысшы кәсіптер жылы деп жарияланғаны белгілі. Ел Президенті бұл бастаманың маңызын ерекше атап өтіп, ел экономикасының келешекте қажет ететін мамандарын дайындаудың стратегиялық рөлін нақты көрсеткен болатын. Солтүстік Қазақстан облысы үшін бұл бастама өзекті сипат алып отыр, себебі өңірде алдағы жылдары ірі тау-кен металлургия жобаларын іске асыру жоспарланып отыр.
СҚО әкімі Гауез Нұрмұхамбетовтің айтуынша, аймақта болашақта тау-кен металлургиялық комбинат салу көзделіп отыр. Қазірдің өзінде «Сырымбет» олово және «Ақсоран» вольфрам кен орындарын игеру жұмыстары жүргізілуде. Бұл – өңір экономикасының жаңа серпін алуына мүмкіндік береді. Сонымен қатар, жаңа өндірістермен бірге жұмыс орындары ашылып, білікті мамандарға деген сұраныс артады.
Аймақ басшысы педагогтардың тамыз конференциясында атап өткендей, бір ай бұрын Айыртау ауданындағы агротехникалық колледж бен АО "Tin One Mining" компаниясы арасында меморандумға қол қойылған. Бұл құжат негізінде колледжде тау-кен өндірісі мамандықтары бойынша оқыту басталады. Студенттер тек теориялық білім алып қана қоймай, нақты өндіріс орындарында практикадан өтіп, болашақта сұранысқа ие кәсіби маман ретінде қалыптасады.
Аймақ басшысы дуалды оқыту жүйесінің өңірде тиімділігін дәлелдегенін атап өтті. Мысал ретінде, CLAAS зауыты мен ТОО «Радуга» кәсіпорындарында оқып жүрген студенттер практика барысында 200 мың теңгеге дейін жалақы алады және оқу бітірген соң жұмысқа орналасу кепілдігіне ие.
— Дәл осы тәсілді біз горно-металлургия саласына да енгіземіз, — деді облыс әкімі.
Г. Нұрмұхамбетов қабылданып жатқан шаралардың негізгі мақсаты – жастарды сұранысқа ие мамандықтарға оқытып, оларды еңбек нарығында бәсекеге қабілетті ету екенін айтты. Бұл тәсіл болашақта Солтүстік Қазақстан облысын еліміздегі тау-кен металлургия саласының жаңа орталығына айналдыруға сеп болады.
