Солтүстік Қазақстан облысының тұрғыны балық аулап жүріп, кездейсоқ тарихи жаңалық ашты. Ол мамонттың алып сүйегін тауып алды, деп хабарлайды Aqshamnews.kz.
Ғылым және жоғары білім министрлігінің мәліметінше, сүйек Қызылжар ауданына қарасты Бәйтерек ауылы маңынан табылған. Әсет Шайкин есімді жергілікті тұрғын балық аулап жүріп, ерекше олжаға тап болып, оны тарихшы-археолог Анатолий Плешаковқа тапсырған.
сурет: ҒЖБМ
Екеуі бірге оқиға орнына барып, аумақты қарап шыққанымен, басқа сүйектер табылмаған. Тарихшының айтуынша, ежелгі жануардың қалған бөліктері топырақ астында жатуы мүмкін.
"Бұл өте қызықты олжа. Сүйектің ұзындығы шамамен 1 метр. Жасы - шамамен 15 мың жыл, яғни жоғарғы палеолит дәуіріне жатады. Ол өте ірі мамонтқа тиесілі болған. Бұған дейін де СҚО аумағынан ежелгі жануарлардың қалдықтары табылған. Келесі жылы осы жерде қазба жұмыстарын жүргізіп, сүйектің басқа бөліктері мен еңбек құралдарын тапсақ, бұл аймақтағы алғашқы палеолиттік ескерткіш болуы мүмкін", - деді Плешаков.
сурет: ҒЖБМ
Маманның сөзінше, болашақ қазбалар нақты осы аумақта мәдени қабаттар мен артефакттердің бар-жоғын анықтауға мүмкіндік береді және толыққанды археологиялық зерттеу жүргізу мәселесін шешуге негіз болмақ.