Алматы қаласы бойынша қылмыстық-атқару жүйесі департаментіне қарасты №11 мекемесінде ҚР Конституциясының 30 жылдығына орай, Қазақстан Парламенті Мәжілісі VIII шақырылымының депутаты, ережесіз жекпе-жектен ҚР еңбек сіңірген спорт шебері, Азия чемпионы, Еуропа чемпионы, Ережесіз жекпе-жектен әлемнің екі дүркін чемпионы Ардақ Назаров және ММА-ден әлемнің екі дүркін чемпионы Қазбек Әшіммен, ММА-ден әлемнің бір дүркін чемпионы Аңсар Дәулетбай және Батырбек Абылаймен кездесу өтті.
Спортшылар балалар колониясында жазасын өтеп жатқан жасөспірімдермен “Спорт - денсаулық кепілі” туралы, ал нашақорлықтың құрдымға сүйрейтіні жайында диалог орнатты.
Сонмен қатар іс-шараға Алматы қаласы және Жетісу ауданының прокуратура өкілдері қатысты.
Ардақ Құттықожаұлы қазіргі күнге дейін жеткен жетістіктері, бағындырған белестері туралы әңгімеледі. Ол өмір жолын баяндай отырып, жасөспірімдерді жаман әдеттерден алыс болуға, салауатты өмір салтын ұстануға шақырып, қоғамға пайдасы тиер жақсы азамат болып шығуларына тілектестігін білдірді.
Иә, мұндай кездесулер жазалы жасөспірімдер үшін ауадай қажет.
Екіжақты диалог, пікір алмасу кеші ҚР Премьер-Министрінің өкімімен бекітілген "Қылмыстық-атқару (пенитенциарлық) жүйесі мекемелеріндегі сауықтырудың 2023-2025 жылдарға арналған Жол картасын" іске асыру аясында ұйымдастырылды.
Іс шара соңында мекеме бастығының міндетін атқарушы әділет подполковнигі Нұрлан Серікұлы Керебаев меймандарға мекемедегі жазалы жасөпірімдердің атынан алғысын білдірді.