Алматыда «ALMA CUP 2023» және басқа да жастар сайыстары қалай өтті
Алматыда Республика күнін мерекелеу аясында 5500-ден астам адамды қамтыған жастарға арналған 20-дан астам іс-шара ұйымдастырылды. Мәселен, өткен демалыс күндері жоғары оқу орындарының студенттері арасында «ALMA CUP 2023» турнирі өтті, деп хабарлайды Almaty-akshamy.kz
«Спорт чемпионаты-қала студенттері арасында ең танымал спорт түрлерін біріктіретін ауқымды жобалардың бірі. Жоба жастардың спорттық дайындығын және футбол, волейбол, баскетбол және киберспорт сияқты спорт түрлеріне қызығушылығын арттыруға бағытталған», - деп атап өтті Алматы қаласының жастар саясаты басқармасы.
Волейболдан жүлде қоры 1 200 000 теңгені құрады. Оның ішінде 600 000 теңге – ерлер арасындағы, қалған 600 000 теңге – әйелдер арасында волейболға жұмсалды. Волейболдан ерлер арасындағы турнирге мегаполистің 22 жоғары оқу орны, әйелдер арасында – 14 жоғары оқу орны қатысты. Жарыс ойыны 2 күнге созылды, оның қорытындысы бойынша әйелдер волейбол турнирінде 1 орынды ҚазСТА-ның «АДК» командасы иеленді, 300 000 теңгені жеңіп алды, 2 орынды – ҚазСТА-ның «Рахат» командасы 200 000 теңгені және 3 орынды – ҚазҰПУ командасы иеленіп, 100 000 теңгені алды. Ерлер арасындағы турнир нәтижесі бойынша ҚазСТА командасы 1 орынды жеңіп алды, оған 300 000 теңге, 2 орынды ҚазҰУ командасы, 200 000 теңге, 3 орынды ҚазҰТЗУ командасы иеленді, 100 000 теңге көлемінде ұтыс алды.
«JAS SPEAK» пікірсайыс турнирі барысында Алматы жастары «Қазіргі Қазақстандағы сын-қатерлер мен перспективалар» тақырыбын талқылады. Финалға 30-дан астам команданың 16-сы шықты. Жеңімпаз «Led Zeppelin» фракциясы болды.
Сондай-ақ, Jaidarman Almaty «Қазақстан КВН Одағы» және жастар саясаты басқармасымен бірлесіп «Алатау» дәстүрлі өнер театрында «Алматы әкімі кубогы» ойынын өткізді. Байқау қорытындысы бойынша республиканың үздік командалары арасында жүлделі орындарға: Алматыдан «Энерго» командасы (3 орын және 400 000 теңге), Талдықорғаннан «Шапалақ» командасы (2 орын және 600 000 теңге) және Тараздан «Жуалы» командасы (1 орын және бас жүлде – 1 000 000 теңге) ие болды.
Бұлардан басқа, Алатау ауданында NEET санатында жастар арасында футболдан турнир, қаланың барлық аудандарында жастар арасында футболдан «JAS CUP» турнирі және т. б. өтті.