Тоқ ішек қатерлі ісігі — әлемдегі, соның ішінде Қазақстандағы ең жиі кездесетін онкологиялық аурулардың бірі.
Бұл – тік немесе тоқ ішекте дамитын қатерлі ісік. Ауру көбінесе ерте кезеңдерде баяу және айқын белгілерсіз дамитынына қарамастан, дәл осы кезеңде оны анықтау және сәтті емдеу оңай. Сондықтан профилактика және тұрақты скрининг осы аурумен күресте шешуші рөл атқарады деп Алматы онкологиялық орталығының онкологы Бағдат Серікбаев бөлісті.
Тәуекел тобына 50 жастан асқан ерлер мен әйелдер, артық салмағы бар, ет өнімдерін көп тұтынатын, талшықты тағамдарды аз жейтіндер, тұқым қуалайтын бейімділігі бар немесе ішек аурулары бар адамдар, темекі шегетіндер мен алкогольді шамадан тыс пайдаланатындар жатады.
Сондықтан Қазақстанда 50-ден 70 жасқа дейінгі азаматтар арасында, жұп жылдары (50, 52, 54, 56, 58, 60, 62, 64, 66, 68, 70 жас) тоқ ішек қатерлі ісігіне скрининг жүргізіледі.
Бағдарламаға жасырын қанға нәжіс талдауы және қажет болған жағдайда колоноскопия кіреді. Бұл – ауруды ерте анықтаудың тиімді әдістері. Тексеру ішек аурулары бойынша есепте тұрмаған адамдарға арналған. Аурудың басты қаупі – оның «үнсіз» дамуы. Белгілер, әдетте, кеш кезеңдерінде пайда болады. Үлкен дәреттің өзгеруі, нәжістегі қан, іштің ауыруы, салмақтың күрт төмендеуі мен әлсіздік. Алайда ауру ерте кезеңінде белгілерсіз өтуі мүмкін, және оны тек скрининг арқылы ғана ауыр асқынулар пайда болмай тұрып анықтауға болады.
Маңызды: егер ісік бірінші сатысында анықталса, толық жазылып кету мүмкіндігі 90%. Кеш анықталған сайын емдеу қиындайды, жазылып кету ықтималдығы төмендейді.
«Скрининг – бұл қорқынышты да, ауыр да емес. Бұл – өміріңізді сақтап қалуы мүмкін жауапты қадам. Сондықтан, әсіресе ересек жаста профилактикалық тексеруден өту өте маңызды. Денеңізге мән беріңіз, ауру белгілерін күтпей, алдын ала әрекет етіңіз. Емханаңызға барып, мақсатты топқа кіретіндігіңізді анықтаңыз және скринингтен өтіңіз», – дейді Бағдат Серікбаев.
Тоқ ішек қатерлі ісігі – алдын алуға болатын ауру. Ең бастысы – кейінге қалдырмау.