16 желтоқсан – қазақтың әйгілі опера әншісі, Қазақстанның халық әртісі Бибігүл Төлегенованың туған күніне орай, Димаш Құдайберген өз әлеуметтік желісінде әншіге арнап жүрекжарды жазба жариялады, деп хабарлайды aqshamnews.kz
Димаш өзінің жазбасында Бибігүл Ахметқызының терең әрі әсерлі дауысы тек Қазақстанда ғана емес, шетелде де көрермендердің жүрегін жаулағанын атап өтті. Ол қазақ музыка мәдениетіне деген сүйіспеншілігін жастарға жеткізіп, қаншама буынды шабыттандырып келе жатқан Бибігүл апайының ұлағатты ұстаздық еңбегін ерекше құрметтейтінін жеткізді.
– Құрметті Бибігүл Ахметқызы! Күні кеше алған марапатымды сіздің 95 жылдық мерейтойыңыздың қарсаңында сізге арнауға рұқсат етіңіз. Сіздің өнеріңізден нәр алып, бала кезімнен сусындап өстім. Аналық қамқорлығыңыз бен ұстаздық өсиетіңіз маған үлкен шабыт беріп, осы күнге дейін жеткен жетістіктерімнің негізі болды.
Сондай-ақ, Димаш өз жазбасында #dears жанкүйерлеріне және барша жерлестеріне шын жүректен алғыс білдіріп:
– Еліміз аман, жұртымыз тыныш болсын! – деген ізгі тілегін жолдады.
Бибігүл Ахметқызының 95 жылдық мерейтойы – қазақ өнері үшін ерекше мереке!