Премьер-министр Олжас Бектенов Үкімет отырысы кезінде маңызды қоңырау қабылдап, Үкімет отырысынан шығып кетті, деп хабарлайды Аqshamnews.kz тілшісі.
Үкіметтің сейсенбі күні сағат 10:00-де басталған отырысы кезінде күтпеген жағдай болды. Премьер-министр Олжас Бектеновке үкіметтік байланыс телефонына қоңырау түсті.
Отырыстың басында Бектенов жаңадан тағайындалған оқу-ағарту министрі Жұлдыз Сүлейменованы таныстырып, оның Конституцияға ант беру рәсімін өткізді. Дәл осы сәтте премьердің үкіметтік байланыс телефоны шырылдап, Бектенов қоңырауға жауап беріп, залдан шығып кетті.
Жиынды уақытша бірінші вице-премьер Роман Скляр жүргізді. Ол министрлердің күн тәртібіндегі баяндамасын жалғастырып, Денсаулық сақтау министрі Ақмарал Әлназарованы трибунаға шақырды.
Олжас Бектенов залға көп кідірмей, шамамен 12-ші минутта қайта оралды.
Мұндай жағдайлар сирек кездеседі, әдетте премьер-министр отырысты толық өзі басқарады. Сарапшылардың пікірінше, бұл қоңырау аса маңызды болған болуы мүмкін, себебі залдағы телефон байланысы мемлекет басшысымен және жоғары деңгейдегі шұғыл байланыс үшін қолданылады.
Айта кетейік, бұған дейін, 29 қыркүйекте Президент Қасым-Жомарт Тоқаев бұрынғы Оқу-ағарту министрі Ғани Бейсембаевты қызметінен босатып, оның орнына Жұлдыз Сүлейменованы тағайындаған еді.