Қазақстан Республикасының Сыртқы істер министрлігі 2026 жылғы 13 қаңтарда Қара теңіз акваториясында Каспий құбыры консорциумының теңіз терминалына бағыт алған үш танкерге ұшқышсыз ұшу аппараттары арқылы жасалған шабуылдарға байланысты алаңдаушылық білдіреді, - деп хабарлайды Aqshamnews.kz.
Осыған байланысты Қазақстан тарапы бірқатар еуропалық мемлекеттердің елшілерімен шұғыл кездесулер өткізіп, сондай-ақ АҚШ және басқа да шетелдік серіктестермен консультациялар жүргізді. Аталған кездесулер барысында халықаралық құқық нормаларын қатаң сақтау, сондай-ақ көмірсутек ресурстарын тасымалдаудың, оның ішінде теңіз жолдарындағы қауіпсіздігін қамтамасыз ету жөнінде қажетті шаралар қабылдаудың маңыздылығына ерекше назар аударылды.
Қазақстан Республикасының қандай да бір қарулы қақтығыстарға қатыспайтыны, жаһандық және еуропалық энергетикалық қауіпсіздікті нығайтуға тұрақты түрде үлес қосып келе жатқаны атап өтілді. Сонымен қатар еліміз энергия ресурстарын халықаралық талаптарға толық сәйкес әрі үздіксіз жеткізуді қамтамасыз етіп отырғаны айтылды. Осы тұрғыда аталған танкерлердің барлық қажетті рұқсат құжаттары болғаны және талапқа сай сәйкестендіру құралдарымен жабдықталғаны көрсетілді.
Министрлік соңғы уақытта мұндай оқиғалардың жиілеуі халықаралық энергетикалық инфрақұрылымның қауіпсіз әрі тұрақты жұмыс істеуіне төнетін тәуекелдердің артып келе жатқанын білдіретінін атап өтіп, серіктестерді осындай инциденттердің алдын алу мақсатында бірлескен әрі үйлестірілген шаралар әзірлеу үшін тығыз өзара іс-қимыл жасауға шақырды.
