Бүгін Алматыда заманауи Digital Fest Almaty фестивалі өтуде. Үлкен интерактивті алаңға айналып шыға келген Панфилов көшесіне жиналған алматылықтар мен шаһар меймандарына роботтар қызмет көрсетуде.
Қала күнін мерекелеп жүрген тұрғындар цифрлық аймақта жаңа технологиямен жабдықталған ерекше кеңістіктегі дрондар орналасқан “Болашақ сферасын”, Алматының символына айналған "Цифрлық алманы" тамашалауда. VR-ойындар мен тақырыптық фотоаймақтарда кезекке тұрғандар қарасы да аз емес.
Иә, Қала күнінде демалуға, серуендеуге шыққан тұрғындарды қас қағым сәтте-ақ портретіңізді салып беретін суретші-робот, мерекенің мезеттерін мәңгілік естелікке айналдырып беретін фотограф-робот пен ерекше сәттеріңізді бейнебаянға түсіре қоятын оператор-робот та қарсы алуда.
Жарқ-жұрқ еткен аймақта қыдырып жүрген үлкен де, кіші де көңілді. Олар цифрлық кейіпкерлермен бірге мерекелік атмосфераға еніп кетуде. Бұл фестиваль озық технология мен мәдениет мәйегін тоғыстырып, отбасылық демалысқа, интерактивті ойындарға және балалардың инновациялар әлемімен танысуына мүмкіндік береді дейді ұйымдастырушылар.
Президентіміздің күні кеше жарияланған Жолдауында елімізді толыққанды цифрлық мемлекетке айналдыру – стратегиялық міндет ретінде белгіленген, ал бұл үдерісте Алматының рөлі бұрынғыдан да маңызды бола түспек. Себебі, мегаполисіміз еліміздегі цифрлық трансформацияның алдыңғы шебінде тұр.
_”Біздің кезімізде цифрландыру деген ұғым болған жоқ. Немерелерім ерекше көзілдіріктер киіп, түрлі ойындар ойнап мәз болды. “Калейдоскоп” деген фотозонасы да керемет екен. Жәшіктегі алмаларды балаларға роботтың алып беріп жатқаны тіпті қызық. Заманауи көштен қалмай, осылай жаһанданып жатқанымыз Алматыдай алып қала үшін де, оны дамытатын болашақ ұрпақ үшін де маңызды", – дейді қала тұрғыны, зейнеткер Раушан Ескермесова.
Заманауи интерактивті Digital Fest Almaty фестивалі кешке дейін жалғасады.