Мемлекет басшысының тапсырмасына сәйкес, Қазақстанда отандық фармацевтикалық өндірісті дамыту мақсатында Шымкентте ірі инвестициялық жоба қолға алынды.
Қазақстан Республикасының Үкіметі Денсаулық сақтау министрлігі мен «Химфарм» АҚ арасындағы келісім аясында «Халықты қолжетімді дәрілік препараттармен қамтамасыз ету және отандық фармацевтика өндірісінің үлесін арттыру» жобасы іске қосылды, – деп хабарлайды aqshamnews.kz.
ҚР Премьер-министрі Олжас Бектенов қаулыға қол қойды. Жоба аясында Polpharma Santo компаниясында 300 жаңа жұмыс орны құрылып, ғылыми зерттеулерді дамытуға арналған қаражатты қоса алғанда, жалпы 39,5 млрд теңге жеке инвестициялар тартылды. Жобаның алғашқы кезеңін 2029 жылдың соңына дейін іске қосу жоспарланған.
Жаңа өндіріс онкологиялық, жүрек-қан тамыр, инфекциялық және созылмалы ауруларға, соның ішінде туберкулезді емдеуге арналған 38 түрлі дәрілік зат шығаруға мүмкіндік береді. Өндіріс халықаралық сапа стандарттарына сай жұмыс істейді.
Бұл бастама фармацевтикалық өнімдер өндірісін локализациялауға, халық үшін дәрілік препараттардың сапасы мен қолжетімділігін қамтамасыз етуге, сондай-ақ экспорттық әлеуетті арттыруға бағытталған. Жалпы, фармацевтика саласында 316,3 млрд теңге сомасына 6 инвестициялық келісім жасалып, саланың тұрақты дамуы мен инвестициялық тартымдылығы айқын көрініс тапты.