Шымкентте денесі қоқыстан табылған Диана Оңғарбаеваның ісі сотта қарала бастады, - деп хабарлайды aqshamnews.kz тілшісі.
Алғашқы процессте прокурор қанды қылмыстың жай-жапсарын баяндады. Мемлекеттік айыптаушының айтуынша, 26 жастағы келіншекті мектеп оқушысы пышақтап, мәйітін қорлаған.
"Кәмелетке толмаған сотталушы Анар өлген адамның мәйітін қорлап, қылмысты қасақана жасаған. Анар өзінің қылмыстық әрекетін әрі қарай жалғастырып, жәбірленуші Оңғарбаеваның астының шалбарының оң қалтасынан самсунг ұялы телефонын жымқырып жасаған қылмыстық іс-әрекетін жасыру мақсатында мәйітін қара түсті политэтилен пакетке орап тұрғын үй ауласында тұрған құрлыс арбасына салып, қоқыс жәшігінің жанына апарып тастаған", - деді мемлекеттік айыптаушы Нұржігіт Ерментай.
Тергеу дерегінше, күдікке ілінген 11 сыныптың оқушысы жазғы демалыста қалаға нәпақа табу үшін келіпті. Сөйтіп құрылыс істеп жатқан баспанада жалғыз қалып, әлеуметтік желіден үй тазалаушыны іздеп табады.
Сұмдықтың бәрі Диана Оңғарбаева жұмысын біткен соң басталыпты. Келіншек келіскен 15 мың теңгені сұрағанда айыпталушы оған пышақ сұғып, кейін жансыз денесін қорлаған дейді прокурор.
Еске салайық, тамызда Шымкенттегі қоқыс жәшігінен екі баласы бар әйелдің мәйіті табылған еді. 26 жастағы тұрғынның сүйегін қоқыс тазалайтын жұмысшылар байқаған. Жоғалған Диананың денесі сол аумақта 10 күн бойы жатқан екен. Етегі жасқа толған марқұмның анасы тергеушілер іске немқұрайлы қарамағанда қызымның денесі уақыты табылатын еді деп отыр.
"Бала Қасқасу баласы дегеннен кейін Қасқасудың бәрін іздедік. Таппадық. Сонда Қаратау РУВД нелері де іздедік іздедік деп іздемеген. Мен 28 күні жазам арыз 29 Астанаға жазам содан кейін телефоны табылады. 31 қызым табылады мусордан. Сонда милициялар қайда жүрді іздемей. Может іздеп тапқандай бұндай болмайтын еді ғой. Бұлай қорланып өлмейтін еді ғой", - деді марқұмның анасы Қарлығаш Оңғарбаева.
