1-3 мамыр аралығында Түркияда өткен «2nd Turan Cup Open» халықаралық турнирінде арқан тартудан Қазақстан құрамасы жүлделі үшінші орынды иеленді, – деп хабарлайды aqshamnews.kz тілшісі Altainews.kz-ке сілтеме жасап.
Дүбірлі додаға әлемнің 12 елінен келген спортшылар қатысып, жүлде үшін 16 команда өзара бақ сынады. Қатысушылар қатарында Қазақстан, Қырғызстан, Түркия, Әзербайжан, Ауғанстан, Ирак, Сирия, Ливан, Бангладеш, Судан, Ресей елдерінің өкілдері болды.
Құрама команданың капитаны – Шығыс Қазақстан облысы полиция департаменті Риддер қаласы полиция бөлімінің қызметкері, полиция майоры Дулат Есембаев. Оның жетекшілігімен команда жоғары физикалық дайындық пен ұйымшылдықтың үлгісін көрсетіп, үздік үштікке енді.
Дулат Есембаев бала кезінен күрес, грэпплинг, баскетбол және арқан тарту секілді спорт түрлерімен айналысқан. Қызмет жолын ішкі істер органдарымен байланыстырса да, спортқа деген қызығушылығын сақтап, халықаралық деңгейде табысқа жетіп отыр.
Айта кетейік, Дүниежүзілік көшпенділер ойындары өткеннен кейін елімізде арқан тарту спортына қызығушылық артып, бұл бағыт құқық қорғау органдары қызметкерлері арасында да кеңінен дамып келеді.