«Қазақстанда шегірткеден чипсы қашан жасалады?» – деген журналистке ұлттық экономика министрі осылай жауап берді.
Журналистер министрге өткен жылы шегіртке қаптаған кезде айтқан сөзін еске салды. Сол кезде Серік Жұманғарин шегірткеге қатысты бұл – кейбір елдерде тағам ретінде қолданылатын халал өнім деп мәлімдеген болатын. Осыған орай журналистердің бірі: «Қазақстанда шегірткеден чипсы қашан жасалады?» – деп сұрады. Осы сұрақтан кейін бірнеше минутқа созылған пікірталас басталып кетті. Жұманғарин шегірткені жеуге ешқашан үгіттемегенін айтты.
– Мен қашан шегірткеден чипсы жасайық деп ұсыныс айттым? Нені ойдан шығарып отырсыздар? Мен ол шегірткені жеу керек деп айтқан жоқпын! Қайта-қайта неге бұрмалап айтып отырсыздар? Мен тек оның халал өнім екенін айттым. Бұл мәліметті Қазақстан мұсылмандары діни басқармасы да растады. Бірақ мен оны жеу керек дедім бе? Жеймін десеңдер – өздерің біліңдер, – деп жауап берді министр.