Қарттар айлығының аясында «Шаңырақ» әлеуметтік қызмет көрсету орталығында «Қарттарын қадірлеген ел ардақты» атты әдемі кеш өтті.
Бұл күні аталмыш орталыққа Алатау ауданындағы №212 мектеп-гимназияның оқушылары мен ұстаздары арнайы келіп, өз өнерлерін көрсетті. Ұстаздардың әуелете салған әсем әуені мен балалардың өнері «Шаңырақ» әлеуметтік қызмет көрсету орталығында тұрып жатқан 302 қарияның көңілін көтеріп, оларды бір серпілтіп тастады.
«Біртұтас тәрбие бағдарламасы» аясында ұйымдастырылған шараның басты мақсаты – ұлттық құндылықтарымызды дәріптеу және қарияларымызды құрметтеу. Сонымен қатар, жас ұрпақ бойына адамгершілік, отансүйгіштік, ізгілік сияқты адами қасиеттерді сіңіріп, оларды имандылыққа тәрбиелеу болды.
– Қарияларымыздың көңілі көтеріліп, қуанып қалды. Оқушыларымыздың орындаған әндері мен билері қариялардың көңілінен шығып, олардан ақ баталарын алдық. Осындай шаралар арқылы біз де жас ұрпақ бойына ұлттық құндылықтарды сіңіруге тырысамыз. Сонымен қатар, мектеп мұғалімдері қайырымдылық танытып, 200 мың теңгеге қарияларға қажетті дәрі-дәрмектерді әкеліп бердік. Біз ағымдағы оқу жылында жұмысын бастаған жаңа мектеппіз. Соған қарамастан, біз қала өміріндегі барлық іс-шараларға белсене қатысып жатырмыз. Мәселен, Жамбыл ауданындағы Ұзынағаш өнер мектебімен ынтымақтастық жөніндегі меморандумға қол қойдық. Олар да бүгін келіп, өнерлерін көрсетуде, – дейді №212 мектеп директорының бейіндік оқыту жөніндегі орынбасары Арай Өмірбекқызы.
