Будапешт қаласында 45-ші шахмат Олимпиадасы (45th FIDE Chess Olympiad) өтуде.
Бұл халықаралық турнирге әлемнің 180-нен астам елінен шахматшылар қатысуда. Олардың қатарында Қазақстанның әйелдер және ерлер құрамалары да бар, деп хабарлайды aqshamnews.kz.
Бірінші турда Қазақстанның әйелдер құрамасы (Меруерт Камалиденова, Ксения Балабаева, Алуа Нұрман және Амина Қайырбекова) Уругвай командасын 4-0 есебімен айқын басымдықпен жеңіске жетті.
Ерлер құрамасы (Қазыбек Нөгербек, Әлішер Сүлейменов, Рамазан Жәлмұханов және Алдияр Ансат) Суринам құрамасынан дәл осындай есеппен басым түсті.
Екінші турда Қазақстан құрамалары үшін нәтиже сәл күрделірек болды. Әйелдер құрамасы Финляндия командасымен кездесті. Ойын барысында Бибісара Асаубаева Анастасия Кейнәненмен тең түсті. Ал Алуа Нұрман Лила Бедердинге есе жіберді. Дегенмен, Ксения Балабаева мен Амина Қайырбекова жеңіске жетіп, тур нәтижесі 2½-1½ болып Қазақстанның пайдасына шешілді.
Ерлер құрамасы екінші турда Монако құрамасын 3½–½ есебімен жеңді. Денис Махнёв Амир Багеримен тең ойнаса, Әлішер Сүлейменов, Рамазан Жәлмұханов және Алдияр Ансат қарсыластарына мат қойды.
Үшінші турда Қазақстанның ерлер құрамасы Вьетнам құрамасымен, ал әйелдер құрамасы Австрия құрамасымен бақ сынайтын болады.
Керек дерек
Шахмат Олимпиадасы – бұл шахматтың халықаралық аренадағы ең беделді жарыстарының бірі. FIDE (Халықаралық шахмат федерациясы) ұйымдастыратын бұл турнир алғаш рет 1927 жылы Лондонда өтті. Бүгінгі күні шахмат Олимпиадасы әр екі жыл сайын өткізіліп, әлемнің түкпір-түкпірінен жиналған мықты шахматшылары бақ сынайды. Қазақстан құрамасы да бұл турнирде бірнеше рет сәтті өнер көрсетіп, еліміздің намысын қорғауда.
Шахмат Олимпиадасы тек командалық жарыс емес, сонымен қатар шахмат мәдениетін насихаттау, елдер арасындағы ынтымақтастықты нығайту және шахматтың дамуына үлес қосу мақсатындағы маңызды шаралардың бірі болып табылады.
Еске салайық бұған дейін шахматтан өтетін 45-ші Олимпиадаға ел құрамасынан кімдер баратыны жайында жазған болатынбыз.