Парламент Сенатының Төрағасы Мәулен Әшімбаев бастаған АЭС салуды қолдау жөніндегі халық штабы Абай облысына барды, деп хабарлайды aqshamnews.kz
Штаб құрамында депутаттар, сарапшылар және белсенді азаматтар бар. Олар референдумға орай ақпараттық-түсіндіру жұмыстары аясында ауылшаруашылық өнімдерін өндірушілермен, білім беру саласының мамандарымен және коммуналдық қызметтер саласындағы еңбек ұжымдарымен кездесті.
Білім беру саласының қызметкерлерімен өткен кездесуде Мәулен Әшімбаев АЭС салу мәселесіне кешенді көзқарас қажет екенін атап өтті. Ол жаңа технологияларды зерттеп, өндіріске инновацияларды енгізудің маңыздылығына назар аударды. Сонымен қатар, Сенат Төрағасы дұрыс шешім қабылдауға кедергі келтіретін ескі стереотиптер мен қағидалар туралы да айтты.
«АЭС-тің қауіпсіздігі көпшілікті алаңдатып отырғаны белгілі. Мұндай алаңдаушылық негізінен өткен ғасырдағы ядролық сынақтар мен апаттардың салдарынан туындағаны түсінікті. Алайда қазіргі атом стансалары сенімді, ең озық және тексерілген технологиялармен салынып жатыр. Бұл III және III+ буындар туралы сөз. Егер халық референдумда АЭС салуды қолдаса, елімізде атом электр станциясы ең жоғары халықаралық стандарттарға сай салынып, толық қауіпсіздік қамтамасыз етіледі. Жобаның қауіпсіздігі МАГАТЭ мен басқа да халықаралық ұйымдардың қадағалауында болады», – деді Әшімбаев.