Семейде полицейлер мас күйде жүк көлігін тізгіндеген жүргізушіні ұстады, деп хабарлайды Aqshamnews.kz тілшісі Polisia.kz-ке сілтеме жасап.
Қалаға кіреберісте "Қауіпсіз жол" жедел-профилактикалық іс-шарасы аясында тоқтатылған жүргізушінің аяғынан әрең тұрғаны бейнетіркегішке түсіп қалған. Ол медициналық куәландырудан өтіп, іс материалдары сотқа жіберілді.
Полиция мәліметінше, ер адамға 15 тәулікке қамау және жүргізуші куәлігінен айыру жазасы қолданылуы мүмкін. Жүк көлігі айыптұраққа қойылды.
Абай облысы Полиция департаменті қалада айналма жолдың жоқтығы өткір мәселе болып тұрғанын атап өтті. Семей арқылы өтуге мәжбүр ауыр жүк көліктері жол қозғалысы қауіпсіздігіне қауіп төндіріп, әсіресе жаяу жүргіншілер көп жиналатын аумақтарда апаттардың жиі болуына себеп болып отыр.
Дегенмен, департаменттің мәліметінше, жол-көлік оқиғаларының саны азайып келеді.
-
2025 жылдың алғашқы сегіз айында өңірде 676 жол апаты тіркеліп, 1038 адам жарақат алды.
-
Бұл 2024 жылдың сәйкес кезеңімен салыстырғанда: апаттар — 13,8%-ға, жарақаттар — 5,4%-ға аз.
-
2024 жылы осы мерзімде 784 апат, 57 адам өлімі және 1097 жарақат болған.