Жақында журналист Аян Қалмұрат гүл дүкенінің атауына ерекше ұсыныс тастап, Threads желісінде жариялаған еді. Әлеуметтік желі қолданушыларына бұл ой ұнап, жазба лезде тарап кетті. Aqshamnews.kz тілшісі трендке айналған идея авторымен сұхбаттасты.
Аян Қалмұраттың айтуынша, ол жиі қиялдап, ойға келген дүниені достарына айтып жүреді. "Себеп-сіз" де аяқ асты туған шабыт.
"Себепсіз" деген ой гүл дүкені қасынан өтіп бара жатқанда сап ете қалды. Соны Threads-ке жаза салғанмын", – дейді ол.
Идея авторының реакциясы қандай болды?
Жазба 2 апта ішінде 300 мың қаралым, 18 мыңға жуық лайк жинаған.
"Мә күшті дедім. Трендке айналатынын білмедім. Кейін достарым, таныстарым жібере бастағанда байқадым. Күшті-күшті дедім", – деді Аян.
Енді идея халықтікі
Жақында Қосшыдан бір кәсіпкер Аянға хабарласып, "гүл дүкенін ашқалы жатырмыз, "Себеп-сіз" атауын қолдансақ бола ма?" деп сұраған.
"Әрине деп, қуана келістім. Шын жүректен табысты болуын тілеймін", – дейді ол.
Автор идеяны сатпағанын және ел арасында себепсіз қуаныш сыйлайтын трендке айналғанына риза екенін жеткізді.
"Күн сайын желіде мыңдаған адам түрлі идея ұсынып, ойын ортаға салып жатады. Қызық аудиолар мен оралымдар трендке, мемге айналады. Себепсіз де соның бір көрінісі. Ешкім мынаны мен бастап едім деп бұлдай алмайды. Енді идея аудиторияға тиесілі", – дейді журналист.
Бүгінде бұл тренд көп қыздың жүрегін жаулады. Жігіттер сүйіктілеріне себепсіз гүл сыйлап, хатқа "себеп - сіз" деп жазып, жолдап жатыр.
Ал Аян Қалмұраттың айтуынша, "себеп-сіз" – енді көпшілікке ортақ идея.