Алматының мұғалімдері референдум мен ел болашағы туралы пікір білдірді, – деп хабарлайды aqshamnews.kz тілшісі.
Референдум қарсаңында Алматының мұғалімдері жаңа конституция жобасы жөнінде пікір білдіре бастады. Оларға бұл жай ғана заң мәтіні емес, бұл әрқайсымызға, балаларымызға, оқушыларымыз бен ата-аналарға, олардың өмір сүретін болашағына тікелей қатысы бар мәселе. Жастармен жұмыс істейтін педагогтер балалардың бойында жауапкершілік сезімін қалыптастырудың маңызы ерекше екенін атап өтеді.
Музыка пәнінің мұғалімі Алмас Нұғманов референдум – әр азаматқа өз сөзін айтуға берілген мүмкіндік екенін айтады:
«Референдум – өз пікіріңді заңды түрде білдіру мүмкіндігі. Дауыс беруге қатысу – әркімнің жеке таңдауы. Әр адам өзі шешім қабылдайды. Бірақ ел болашағы сөз болғанда, бәріміздің жолымыз бір екенін түсінуіміз керек».
Наурызбай ауданы №206 мектеп-гимназиясының тарих пәні мұғалімі Райхан Қуантай референдумға қатысу еліміздің кемел әрі жауапты мемлекет екенін көрсетеді деп санайды:
«Референдумға қатысу – әр азаматтың құқығы әрі жауапкершілігі. Болашағымызға әсер ететін өзгерістерге селқос қарамауымыз керек».
№206 мектеп-гимназиясының ағылшын тілі пәнінің мұғалімі Іңкәр Әлпенова референдумды халықтың дауысымен санасатын әділ жол екенін айтады.
«Референдум – бұл жауаптылық та, таңдау да. Бұл – еліміздің болашағына деген көзқарасымыз. Оған қатысу әркімнің азаматтық борышы әрі жеке шешімі. Дауыс беріп, біз болашақты айқындап жатырмыз»
Педагогтердің пікірінше, конституция жобасындағы өзгерістер – ойлануға және жан-жақты зерделеуге себеп. Референдум әр азаматқа үн қатып, дауысының маңызды екенін сезінуіне мүмкіндік береді.
Алматы мұғалімдері ересектерді балалар мен жастарға үлгі болып, елдегі маңызды оқиғаға белсене араласуға шақырды.