Сәтбаев университетінде Орталық Азия білім беруді аккредиттеу қауымдастығы (CAAAE) және Инженерлік білім беруді аккредиттеу бойынша Еуропалық желі (ENAEE) ұйымдастырған халықаралық деңгейдегі маңызды іс-шаралар өтті. Осы іс-шаралар аясында «ENAEE желісінің аккредиттеу агенттіктеріне қойылатын талаптар» атты халықаралық семинар және ENAEE-нің 29-шы Бас Ассамблеясы ұйымдастырылды.
Ассамблея жұмысына Австрия, Франция, Италия, Испания, Ұлыбритания және басқа да 15 елден келген 16 аккредиттеу агенттігінің басшылары, сондай-ақ инженерлік білім беру сапасын қамтамасыз ету саласындағы қазақстандық және халықаралық сарапшылар қатысты.
Жиынды Сәтбаев университетінің ректоры Мейрам Бегентаев құттықтау сөзімен ашты. Ол университеттің халықаралық аккредитацияға қатысуының маңыздылығын атап өтіп, бұл шараның өңірдегі инженерлік білім беру сапасын арттыруға, сондай-ақ болашақта студенттердің мансап жолында табысқа жетуіне ықпал ететініне сенім білдірді. Сонымен қатар, ректор EUR-ACE аккредитациясының инженерлерді жоғары деңгейде даярлауды қамтамасыз етудегі маңыздылығын ерекше атап өтті.
ENAEE президенті Жозе Карлос Квадрадо өз сөзінде халықаралық ынтымақтастықты нығайту және инженерлік білім беру бағдарламаларын Еуропада ғана емес, басқа аймақтарда да дамыту қажеттігін айтты. Ол Еуропалық одақ пен Орталық Азия арасындағы ынтымақтастықты кеңейту арқылы аймақтағы студенттерге жаңа мансаптық мүмкіндіктер ашуға назар аударды.
Профессор Жозе Карлос Квадрадо Орталық Азиядағы инженерлік білім беру бағдарламаларын аккредиттеуді жетілдіруге бағытталған ірі жобалардың бастамашысы болып табылады. ENAEE ұйымдастырған іс-шаралар өз кезегінде Еуропа мен Орталық Азия арасындағы тәжірибе алмасуды қамтамасыз ететін және инженерлік білім беру сапасын арттыруға арналған маңызды алаң ретінде қызмет етеді.
Бұл кездесулер инженерлік білім беру саласындағы халықаралық стандарттарды енгізуді және аймақтық ынтымақтастықты нығайтуды көздейтін маңызды қадам болды.
