Солтүстік Еуропаның біраз бөлігінде аяз күшейді.
Соның салдарынан Швецияның кей аудандарында мыңдаған адам электр қуатынан ажырап, қиындыққа тап болған. Ал тасжолдарда көліктері оталмай әбігерге түскен жүргізушілер көбейген, деп хабарлайды Almaty-akshamy.kz 24.kz-ке сілтеме жасап.
Мәліметке қарағанда қазір Швецияның солтүстігіндегі сынап бағанасы 38 градусқа дейін төмендеген. Метеорологтар болса алдағы күндері бұдан да қатты аяз болатынын ескертіп отыр.
«Таңғы сағат 4-тің кезінде, үйде жылу жоқ екенін байқадым. Термометр минус қырық градусқа дейін жеткен», - дейді тұрғын Йохан Сундквист.
Норвегия астанасы Ослода да бұрын-соңды болмаған аяз басталды. Бұл елде сынап бағанасы минус 37 градусқа жетті. Синоптиктер мұны рекордтық көрсеткіш дейді. Күннің күрт суытуына байланысты, барлық тау шаңғы курорттары жабылған.