Түркістанда бейбіт күннің батырлары «Түркістан облысына сіңірген еңбегі үшін» төсбелгісімен марапатталды, деп хабарлайды Almaty-akshamy.kz Inform.kz-ке сілтеме жасап.
Төсбелгі таққандардың ішінде батырлықтың нағыз үлгісін көрсеткен азаматтар бар. Солардың бірі - күні кеше ғана ерлігінің арқасында елге танылған Қансейіт Мұхаммед. Сайрам аудандық халықты жұмыспен қамту орталығының қызметкері Ақсукент ауылында орналасқан әрі өзі жұмыс істейтін ғимаратта болған өрт кезінде шатыр үстіндегі Мемлекеттік Туды оттан алып шықты.
Ал Жетісай аудандық полиция бөлімі миграция бөлімшесінің басшысы Аян Хайруллаев өзіне төнген қауіпке қарамай, бейтаныс кейуананы өрттің ортасынан құтқарып қалды. Кентау қаласы, №12 Өрт сөндіру бөлімінің бөлімше командирі, азаматтық қорғау аға сержанты Нұрғали Керімбеков су құбырына құлап кеткен 2 жастағы баланы алып шықты. Қазығұрт ауданының тұрғыны Мейірбек Рысбек әжетханаға түсіп кеткен 1 жастағы баланы құтқарып, елдің ықыласына бөленді. Ерлік жасау әркімнің қолынан келе бермейтіндігін айтқан Түркістан облысының әкімі Өмірзақ Шөкеев бейбіт күннің батырларына құрмет көрсетті. Батыл азаматтар өңір басшысының ілтипатына ризашылық білдіріп, қоғамның дамуына қызмет етуге дайын екендерін жеткізді.