Ол ең ірі медиакомпанияның басшысы болды.
Nur Otan партиясының атқарушы хатшысы Асхат Ораловтың бұйрығымен Nur Media ақпараттық холдингінің бас директоры қызметіне Руслан Әлішев тағайындалды, деп хабарлады Almaty-akshamy.kz.
Руслан Әлішев – М.Қозыбаев атындағы Солтүстік Қазақстан мемлекеттік университетінің және А.Мырзахметов атындағы Көкшетау университетінің түлегі.
Ол Солтүстік Қазақстан облысындағы жергілікті атқарушы органдарда, Петропавл қаласы ішкі саясат бөлімінің маманы қызметінен бастап, басқарма басшысы, облыс әкімінің орынбасарына дейінгі түрлі лауазымдарды атқарды.
Ақпарат және коммуникациялар министрлігі Ақпарат комитеті төрағасының орынбасары болды.
Екі жылдан астам уақыт Nur Otan партиясы Орталық аппаратының саяси жұмыс департаментін басқарған.
2020 жылдың мамыр айынан бастап ҚР Президенті жанындағы «Орталық коммуникациялар қызметі» республикалық мемлекеттік мекемесінің директоры қызметін атқарды.
Nur Media холдингі Қазақстандағы ең ірі медиакомпаниялардың біріне жатады. 2008 жылдың қараша айында «Нұр Отан» партиясының бастамасымен құрылған. Бүгінгі күні холдингтің компаниялар тобына «Астана» телеарнасы, «Айқын», «Литер», «Түркістан», «Қазақстан теміржолшысы» газеттері, NS радиосы және ORDA FM кіреді.