Ұлттық өнердің алтын арқауын үзбей, дәстүрлі музыканы жаңа буынға жаңаша жеткізіп жүрген Құрманғазы атындағы Қазақ ұлттық халық аспаптар оркестрі 93-концерттік маусымын ерекше жобамен ашты. Алматының туған күніне орай өткен мерекелік кеште оркестр сахнасына робот-дирижер шықты.
90 жылдан астам тарихы бар өнер ұжымы бұл жолы дәстүр мен технологияны бір сахнада тоғыстырып, ұлттық музыканы заманауи форматта ұсынды. Жаңа жобаның негізгі мақсаты – ғасырлардан жеткен күй өнерін бүгінгі көрерменге тың тәсілмен таныстыру болды. Ұйымдастырушылар робот-дирижердің көмегімен ұлттық музыкаға, әсіресе жас көрермендердің қызығушылығын арттыруды көздеген.
«Жоба ұлттық музыкалық дәстүр мен заманауи технологияны бір сахнада тоғыстыруды көздеді. Бұл – қазақтың дәстүрлі музыкасын сақтай отырып, оны қазіргі көркемдік және технологиялық шешім арқылы жаңа аудиторияға ұсынуға бағытталған үлкен эксперимент», – деді оркестрдің бас дирижері Абылай Тілепберген.
Осылайша технология ұлттық өнердің орнын алмастырмай, оны танытудың жаңа құралы ретінде қолданылды.
Кеш Алматыға арналды.
Көрермен күй өнерінің жауһарларымен қатар, қалаға арналған музыкалық шығармаларды, қазақ киносының танымал саундтректерін және классикалық туындыларды тыңдады. Мерекелік кештің музыкалық бағдарламасын DJ сүйемелдеуі толықтырды. Ал Алматының символдарының бірі – апорт алмасына арналған көрме көрермен назарына ұсынылды. Концертте дәстүрлі күй, классикалық музыка, заманауи дыбыс пен цифрлық технология өзара үйлесім тапты.
Жаңа маусымның ашылу кешіне жұрт арасында әйгілі өнер иелері қатысты. Олардың қатарында Жұбаныш Жексенұлы, Батыржан Мықтыбаев, Ұлжан Байбосынова, Айдос Жабағин және Әсель Рақымжан бар. Оркестрдің бас дирижері Абылай Тілепберген, Қазақстанның еңбек сіңірген қайраткері Жексен Айсын және халықаралық, республикалық конкурстардың лауреаты Нарын Қажығали өз өнерлерін паш етті. Оркестрдің көркемдік жетекшісі – Қазақстанның еңбек сіңірген қайраткері Батыржан Мықтыбаев.
Ұжым 90 жылдық тарихында қазақтың дәстүрлі аспаптық музыкасын насихаттап, ұлттық мәдениеттің маңызды өнер ұжымдарының біріне айналды.
Оркестр репертуарында Құрманғазы, Тәттімбет, Дәулеткерей, Дина, Сейтек сынды күй өнерінің көрнекті өкілдерінің шығармалары ерекше орын алды.
Маусым аясында робот-дирижер жобасымен қатар, көрерменге бірнеше жаңа жоба ұсынылды. Олардың қатарында «Kurmangazy: next cover concert», «Шам жарығындағы әуен», «QURMANҒAZY COMPOSER LAB» және «Cinema hits» болды. Аталған жобаларда ұлттық музыка түрлі заманауи форматта ұсынылып, дәстүрлі шығармалар жаңа интерпретацияда орындалды. Ал «Cinema hits» жобасында кино музыкасы мен ұлттық оркестрдің үні тоғысты. Осылайша Құрманғазы атындағы Қазақ ұлттық халық аспаптар оркестрінің 93-концерттік маусымының ашылуы ұлттық өнер мен заманауи технологияның үйлесімін көрсеткен ерекше мәдени кешке айналды.
Дана САДЫРҚАН.