Қазақстан Республикасының жаңа Конституциясы жобасында шетелдіктерге жер сатуға тыйым алынып тасталды деген ақпарат шындыққа жанаспайды, деп хабарлайды Aqshamnews.kz.
Жалған ақпаратқа қарсы іс-қимыл орталығы аталған мәліметтің жалған екенін мәлімдеп, бұл дерек фактілерді әдейі бұрмалау арқылы таратылып жатқанын атап өтті.
Орталықтың түсіндіруінше, қолданыстағы Конституцияның 6-бабының 3-тармағындағы жер және табиғи ресурстарға қатысты норма жаңа Конституция жобасында да еш өзгеріссіз сақталған. Аталған талаптардың өзгермейтіні Конституциялық реформа жөніндегі комиссия тарапынан да расталған.
Сонымен қатар жаңа Конституция жобасында мемлекеттің егемендігі, унитарлығы мен аумақтық тұтастығы конституциялық құрылыстың негіздері ретінде бастапқы тарауларда нақты бекітілген. Атап айтқанда, 2026 жылғы 30 қаңтардағы жобаға сәйкес, Қазақстан Республикасының аумағы бөлінбейді және оған қол сұғылмайды, ал мемлекеттің басқару үлгісі мен тұтастығы өзгермейді.
Осыған байланысты орталық шетелдіктерге жер сатуға тыйым салу күшін жойды деген мәлімдемелердің құқықтық негізі жоқ екенін атап өтті. Ведомство азаматтар мен бұқаралық ақпарат құралдарын ақпаратты тек ресми дереккөздерден тексеруге және манипуляциялық мәліметтерді таратпауға шақырды.