Қазір Ресей тарапы банан өсіретін қазақстандық компанияның тәжірибесіне қызығушылық танытып отыр. Бұл туралы Ауыл шаруашылығы вице-министрі Азат Сұлтанов айтты, деп хабарлайды aqshamnews.kz.
Сенат кулуарында министрдің орынбасарына «Интерфаксте» «Ресей Қазақстанның банан өсіру тәжірибесіне қызығушылық танытты» деген ақпарат жарияланғанын сұраған. Осыған қатысты түсінік бере аласыз ба? Елімізде өсірілген банан Эквадордан жеткізілетін өнімнен арзан ба?» деген сұрақ қойылды.
Азат Сұлтанов қазіргі уақытта Түркістан облысында банан өсіріліп жатқанын хабарлады.
Бұл инвестициялық жоба жылына 1 мың тонна банан өсіруге мүмкіндік береді, бұл жалпы банан импортының шамамен 1%-ын құрайды. Қазір баға конъюнктурасы мен жеткізу шығынына байланысты бұл бананның құны ішкі нарықта бәсекеге қабілетті болып тұр. Себебі, қазіргі таңда банан өсіріп жатқан компания барлық партияны қайда жеткізетінін анықтап қойған. Халыққа өнім жетеді ме, жетпей ме? Өйткені ірі дүкендер желісі өнімді ірі көлемде сатып алуға қызығушылық танытуда, – деді вице-министр.
Ол сондай-ақ, мұндай өнімді өндіру үшін шығынды да есептеу керектігін атап өтті.
«Әріптестеріңіз біз апельсин, банан және мандаринді қашан өсіреміз?» деп сұрақ қойған. Мұндағы мәселе – өндірістің рентабельділігіне байланысты. Эквадор мен Бразилиядағы климат өнімді шығынсыз өндіруге мүмкіндік береді. Ал жылыжайда электр, жылу, тыңайтқыш шығыны бар. Өсімдікті қорғау үшін арнайы құралдар қажет. Бұл да шығынды талап етеді. Қазір бұл жоба рентабельділікке шыға алады. Сондықтан Ресей Федерациясы еліміздегі жеке компанияның банан өсіру тәжірибесіне қызығушылық танытты. Бұл өнім нарықта бәсекеге қабілетті болып тұр, – деді Азат Сұлтанов.
Сондай-ақ министрдің орынбасары Түркістан облысы мен батыста зәйтүн ағаштарын өсіру жоспарлары барын айтты.
«Біз тәжірибе жүргіздік. Нәтиже жақсы. Сондықтан біртіндеп осындай бірегей жобаларды іске асырамыз. Отандық өндірушілер дәстүрлі жеткізушілермен бәсекеге түсе алатын болады», – деді ол.