2026 жылғы 1 маусымнан бастап Ресейде тауарды күтуін растау жүйесі енгізіледі, деп хабарлайды Aqshamnews.kz тілшісі.
Жаңа талапқа сәйкес, Қазақстаннан автокөлікпен жүк әкелген кезде Ресейдегі алушы алдын ала жеткізілім туралы құжат рәсімдеп, QR-код алуы керек. Бұл QR-код жүргізушіде болуы және бақылаушы органдар талап еткен жағдайда көрсетілуі тиіс.
QR-код болмаса, көлік Ресей аумағына кіргізілмей, кері қайтарылуы мүмкін.
Қазақстанның Мемлекеттік кірістер комитеті тасымалдаушыларға Ресейдегі алушыдан QR-кодтың рәсімделгенін алдын ала нақтылауға, оны шекараға жетпей тексеруге және қағаз немесе электронды түрде өзімен бірге алып жүруге кеңес берді.
Сондай-ақ QR-кодтағы мәліметтерді тауар ілеспе құжаттарымен салыстыру қажет. Құжаттар дұрыс рәсімделмесе, шекарадан өту уақыты ұзаруы мүмкін.