Былтыр елімізде жиналған коммуналдық қалдықтардың жалпы көлемі 4,1 млн тонна болған.
Бұл алдыңғы жылмен салыстырғанда 8,4%-ға артық, деп хабарлайды Almaty-akshamy.kz
Халық санының өсуін ескерсек, бұл таңқаларлық жайт емес. Десе де, 2022 жылмен салыстырғанда қалдықтардың пайда болуының жан басына шаққандағы орташа қарқындылығы 195-тен 208 кг-ға дейін өскен. Жалпы бұл деңгей соңғы жылдары 200 кг шамасында, бұл 2010 жылдардың басындағы нәтижелерден (230 кг-нан астам) азырақ.
Бізде қалдықтардың негізгі бөлігі, өкінішке орай, дәстүрлі түрде қоқыс үйіндісіне жіберіледі. 2023 жылы көмуге 2,9 млн тонна түскен және оның жартысынан көбі алдын ала сұрыптаусыз қабылданған коммуналдық қалдықтар болды. 2022 жылмен салыстырғанда қоқыс үйіндісіне кеткен қоқыстың жалпы салмағы 11,6%-ға өскен. 2023 жылдың аяғында көмілген қалдықтардың жалпы көлемі 48,5 миллион тоннаға жетті.