АЭС салуды қолдау жөніндегі халықтық штаб жұмысын Павлодар облысында жалғастырды, деп хабарлайды aqshamnews.kz
Сенат Төрағасы Мәулен Әшімбаев бастаған депутаттар, сарапшылар және қоғам қайраткерлері Ақсу және Павлодар қалаларында болып, энергетикалық корпорация ұжымымен және металлургия саласының мамандарымен кездесті. Сонымен қатар, штаб мүшелері сарапшылар қауымдастығы мен белсенді жастармен де жүздесті. Кездесулер барысында АЭС салу мәселесіне қатысты алдағы референдумның маңыздылығы мен мәні талқыланды.
Еуразиялық энергетикалық корпорация және Қазақстан алюминийі компаниясы ұжымдарымен кездесулерде штаб мүшелері энергетика саласындағы өзекті мәселелерге, әсіресе электр энергиясының тапшылығы, электр стансаларының тозуы және импортқа тәуелділікке кеңінен тоқталды.
Мәулен Әшімбаев атап өткендей, Қазақстан жан басына шаққандағы көмірқышқыл газын шығару бойынша әлемде алдыңғы орындардың бірін алады. Осыған байланысты елімізде көміртегі қалдықтарын азайту үшін өндірісте инновацияны кеңінен енгізу маңызды. Ауаға көмірқышқыл газын аз шығаратын энергия көздерін пайдалану арқылы елдегі энергия тапшылығын шешу мәселесі өте өзекті болып отыр.
«Президентіміз Қасым-Жомарт Тоқаевтың мақұлдауымен 6 қазанда елімізде АЭС салу мәселесіне қатысты республикалық референдум өтеді. Референдумның маңыздылығын түсіндіру мақсатында халықтық штаб құрылды. Оның құрамында депутаттар, партиялар, түрлі ұйымдар және ел болашағына бей-жай қарамайтын белсенді азаматтар бар. Қазіргі таңда еліміздегі жұмыс істеп тұрған көмір электр стансаларының тозу деңгейі шамамен 70 пайызға жетті. Әрине, Қазақстан табиғи ресурстарға бай, бірақ олардың көпшілігі қалпына келмейтін ресурстар екенін ұмытпауымыз керек. Бұл ресурстар шексіз емес. Сондықтан елдің болашағын қамтамасыз ететін тұрақты және қауіпсіз энергия көзі қажет. Осы тұрғыда атом электр стансасы ұзақ жылдар бойы сенімді энергиямен қамтамасыз ете алатын әлеуетке ие», – деді Мәулен Әшімбаев.