Сенат төрағасы Мәулен Әшімбаев АЭС салу мәселесіне қатысты республикалық референдумда елордадағы №164 учаскеде өз дауысын берді.
«Бүгін – тарихи, әрі өте маңызды күн. Референдум – Қазақстанның демократиялық даму жолындағы үлкен қадам. Президентіміз Қасым-Жомарт Тоқаевтың "халық үніне құлақ асатын мемлекет" тұжырымдамасы аясында ел болашағына қатысты маңызды мәселелерде халықтың пікірі ескеріліп жатқанын көріп отырмыз», – деді Мәулен Әшімбаев дауыс берген соң БАҚ өкілдеріне.
Сенат спикері референдумның елімізде жаңа саяси мәдениетті қалыптастыруға бағытталғанын атап өтті.
«Мұндай маңызды іс-шараларда халықтың пікірін тыңдап, ескеріп, мемлекеттік органдар шешім қабылдайтын болса, біз өз мақсаттарымызға жетеміз. Қазақстанды дамыған демократиялық мемлекет ретінде қалыптастыру үшін қазақстандықтардың даусы аса маңызды. Бәріміз бірлесіп, Қазақстанды әділетті, демократиялы мемлекет ретінде қалыптастыруға үлес қосамыз», – деп атап өтті Әшімбаев.