Алматыдағы бүкіл қонақүй үшін "Реал Мадрид" қанша төледі?
Бұған дейін белгілі болғандай, УЕФА Чемпиондар Лигасы аясындағы матч үшін Алматыға келген "Реал Мадрид" командасы InterContinental қонақүйіне орналасты. Олар келісімен қонақүйдің басқалар үшін жабылғаны туралы қауесет тарай бастады, - деп хабарлайды Aqshamnews.kz.
Мұндай қауесеттерге себеп болған жайттар – қонақүйдің қоршалуы, ішке командаға қатысы жоқ адамдардың кіргізілмеуі, сондай-ақ 29 қыркүйек кешінде ғимараттың терезелері түгелдей қараңғы болуы: сол кезде қонақүй жұмыс істемей тұрғандай әсер қалдырған.
Бұл ақпаратты SHOT Telegram-арнасы растады: "Реал Мадрид" командасы өз тыныштығын қамтамасыз ету үшін InterContinental қонақүйін 28 қыркүйектен 1 қазанға дейін толықтай жалға алған. Бұл үшін команда 278 миллион теңгеден астам (507 мың АҚШ долларынан көп) қаражат жұмсаған.
Басылым мәліметінше, 28 қыркүйек пен 1 қазан аралығында стандартты нөмірдің орташа бағасы – тәулігіне 375 доллар, ал люкс нөмір – 560 доллар болған. Қонақүйде барлығы 277 бөлме бар, және олардың барлығы матч аяқталғанша "Реалға" тиесілі. Команда 40-тан астам адаммен келген.
Осы күндері футбол мен "Реал" жанкүйерлері қонақүй маңын торуылдап, жұлдызды футболшыларды көруге тырысты. Ал 29 қыркүйек түні Алматы әуежайына жүздеген жанкүйер "Қайраттың" қарсыластарын қарсы алу үшін жиналды.
26–29 қыркүйек аралығында Алматыға "Қайрат" – "Реал Мадрид" матчын көруге Қытай, Үндістан, Ресей, Жапония, Ұлыбритания, Испания, Чехия, ТМД елдері мен басқа да Еуропа мемлекеттерінен 5 мыңнан астам шетелдік қонақ келген.