Қызылордада интернет арқылы алаяқтық жасаған 31 жастағы ер адамға үкім шықты. Ол Instagram желісінде жалған парақша ашып, 121 адамды алдап, шамамен 9 миллион теңге шығын келтірген, – деп хабарлайды aqshamnews.kz тілшісі.
Қызылордада интернет-алаяқтық жасаған ер адам сотталды. Бұл туралы облыстық прокуратура хабарлады.
Ведомство мәліметінше, алаяқтың әрекетінен республика бойынша 121 адам зардап шеккен. Келтірілген жалпы материалдық шығын көлемі шамамен 9 миллион теңгені құраған.
31 жастағы Қызылорда тұрғыны 2025 жылғы 19 қарашада интернетті пайдалану арқылы жасалған алаяқтық үшін 3 жылға бас бостандығын шектеу жазасына кесілген.
Прокуратураның мәліметіне сүйенсек, ол 2024 жылы алдын ала сөз байласқан адамдар тобымен бірге әрекет еткен. Алаяқтық схеманы жүзеге асыру үшін Instagram әлеуметтік желісінде «Dake_87057380827» атауымен жалған аккаунт ашқан. Күдікті өзге адамдардың жеке деректерін пайдаланып, азаматтарды адастырған.
Ол жәбірленушілерге «салған қаражатты үстемемен қайтарып беремін» деп уәде беріп, ақша аударуға көндірген. Кейін түскен қаржыны букмекерлік кеңсе мен төлем жүйесі арқылы иемденіп отырған.
Сот барысында айыпталушы кінәсін толық мойындап, жәбірленушілерге келтірілген шығынды өтеген.
Қазір сотталған азамат тұрғылықты жері бойынша пробациялық бақылаумен жазасын өтеп жатыр. Үкім заңды күшіне енген.